Флик: Бу юлдуздан хафсалам пир бўлди, сотиб юборинг!

«Барселона»ни кетма-кет икки марта чемпион қилган бош мураббий Ханс-Дитер Флик ярим ҳимоячи Френки де Йонгнинг сўнгги ўйинларидан ва жамоадаги ўрнидан қониқмаётгани айтилмоқда. 

Каталония клуби 29 ёшли футболчини муносиб таклиф тушган тақдирда сотиш вариантларини кўриб чиқиши мумкин. Бу ҳақда The Touchline ва Transfer News Live нашрлари журналист Жерар Ромерога таяниб, ижтимоий тармоқ X'да хабар тарқатди.

23 июль куни «Барселона» де Йонгда тиззасидаги ички ён боғлам узилиши аниқланганини маълум қилди. ОАВ ёзишича, унинг майдонга қайтиши бир неча ҳафтадан бир неча ойгача чўзилиши мумкин, бу танланадиган даволаш усулига боғлиқ бўлади.

Де Йонг каталонияликлар сафида 2019 йил ёзидан бери ўйнаб келмоқда. Шу вақт ичида у барча мусобақалар доирасида 297та ўйинда майдонга тушиб, 20та гол урди ва 31та голли пас берди. Футболчининг клуб билан амалдаги шартномаси 2029 йил ёзигача мўлжалланган. Transfermarkt портали маълумотларига кўра, де Йонгнинг бозор қиймати 35 миллион евро атрофида баҳоланмоқда.