Формула-1. Жаҳон чемпионини номи Абу-Дабида аниқланадиган бўлди

Макс Верстаппен Қатар Гран-присида муҳим ғалабани қўлга киритди. Нидерландиялик пойгачи иккала "Макларен" пойгачисини ортда қолдиришга муваффақ бўлди, бу эса Абу-Дабидаги охирги пойга олдидан чемпионлик учун курашни кучайтиради.

Верстаппеннинг ғалабаси учун ҳал қилувчи лаҳза унинг хавфсизлик машинаси чиқаётганда қилган эрта пит-стоп бўлди. "Макларен" жамоаси ҳайдовчилари тўхтамасликка қарор қилишди ва 25-айланагача ўз тўхташларини кутишди.

Иккинчи ўринни ғолибга ютқазган Оскар Пиастри эгаллади. "Уильямс" пойгачиси Карлос Сайнс шоҳсупанинг учинчи поғонасига кўтарилди.

Ландо Норриснинг тўртинчи ўрни унинг чемпионатдаги пешқадамлигига жиддий зарба бўлди, британиялик маррага Сайнсдан кейин етиб келди. Кучли бешликка "Мерcедес" ҳайдовчиси Кими Антонелли якун ясади.