ФР: Ҳасановда рекорд, "Пахтакор"дан антирекрод...

Coca-Cola Суперлиганинг 2-тури старт олди. Кун доирасидаги дастлабки ўйинда "Сўғдиёна" "Олимпик" билан дурангга эришган бўлса, "Пахтакор" Фарғонада мағлубиятга учради. Қуйида мазкур баҳсларга оид қизиқарли фактларни келтирамиз.

1. "Сўғдиёна"нинг ғалабасиз ўйинлари қаторасига 13тага етди. Энг қизиғи, бу серия 2022 йилнинг август ойида айнан "Олимпик" майдонидаги мағлубият билан бошланган эди.

2. Жасур Ҳасанов Ўзбекистон чемпионатларининг 23 мавсумида тўп киритган тарихдаги 2-футболчига айланиб, Анвар Бердиевнинг рекордини такрорлади. У "Навбаҳор", "Машъал", "Бунёдкор", "Локомотив", "Қизилқум", "Насаф", ОКМК ва "Сўғдиёна" таркибида рақиблари дарвозасини ишғол қилган.

3. "Сўғдиёна" Ҳасанов гол урган баҳсларни 12 ўйиндан бери ютқазмаяпти. Бунақаси охирги бор 2019 йилда содир бўлган эди.

4. "Олимпик" ва "Сўғдиёна" ўртасидаги охирги ўйинни ҳам Абдурашид Худайберганов бошчилигидаги ҳакамлар бригадаси бошқарган эди. "Жар" стадионида ўтган ўйин мезбонларнинг минимал ҳисобдаги ғалабаси билан тугаган.

5. "Пахтакор" 7 йиллик танаффусдан кейин "Нефтчи"га ютқазди. Бунақаси охирги марта 2016 йилнинг октябрь ойида рўй берган бўлиб, Шерзод Ҳакимовнинг голи фарғоналикларга ғалаба келтирган. Қизиғи, ўша баҳсда ҳам Ильгиз Танташев бошчилигидаги ҳакамлар бригадаси ишлаган эди.

6. Бу "Пахтакор" тарихидаги энг ёмон старт ҳисобланади. "Шерлар" ҳали ҳеч қачон чемпионат бошидаги 2 ўйинни ютқазишмаган эди.

7. "Нефтчи" 16 йиллик танаффусдан мавсум аввалидаги 2 ўйинни ўз фойдасига ҳал қилди. Бунақаси охирги марта 2007 йилда содир бўлган эди...

Фахриддин Рўзиев