Францияда қуролланган фанатлар клуб базасига бостириб кирди

Франциянинг “Реймс” футбол клуби матбуот хизмати орқали қуролланган мухлислар клуб базасига кириб келганини маълум қилди.

Ҳодиса Франция чемпионатининг Лига 2 дивизионидаги ўйинидан кейин содир бўлган, унда “Реймс” футболчилари сафарда “Лаваль” билан 2:2 ҳисобида дуранг ўйнаган.

- Бир гуруҳ шахслар, айримлари ниқобда ва қўлбола қуроллар кўтариб, жамоанинг Лавалдан қайтишини кутиш учун клуб марказига кириб келишди. Бундай усуллар мутлақо қабул қилиб бўлмайди ва бутун клубни қаттиқ ларзага солди.

Бир неча ойдан бери, клуб мулоқотга тайёр бўлишига қарамай, зўравонлик ва қабул қилиб бўлмайдиган хатти-ҳаракатлар кучайиб бормоқда. “Лаваль” билан ўйиндан кейин қизил чизиқ кесиб ўтилди.

Вазият назоратдан чиқмаслиги учун ҳуқуқни муҳофаза қилиш органларини чақиришга тўғри келди. Биз мухлисларнинг норозилиги ва ранжишини тушунамиз, аммо ҳеч нарса қўрқитиш, ирқчилик ва ўлим таҳдидларини оқламайди.

Биз бундай ҳаракатларни очиқ қоралашни ўз бурчимиз, деб биламиз. Клуб бундай ҳолатлар яна такрорланмаслиги учун суд ишларини бошлайди. Биз уларнинг аҳамиятини камайтиришни истамаймиз ва фожиа юз бериш хавфига йўл қўймаймиз, - дейилади  клуб баёнотида.

“Реймс” ўтган мавсум якунига кўра Лига 1дан тушиб кетган ва иккинчи дивизионда 30 та ўйиндан кейин  бешинчи ўринда бормоқда.