Фраттези "Интер"да қолди, "Ноттингем Форест" варианти рад этилди

"Интер" ярим ҳимоячиси Давиде Фраттези кўплаб миш-мишларга қарамай, жамоада қолди.

26 ёшли футболчи Кристиан Киву жамоасида мунтазам ўйин амалиётига эга эмаслигидан норози эди ва қишда жамоасини ўзгартириш ҳақида жиддий ўйлаб кўрган. Унга маҳаллий ҳамда хорижий клублар қизиқиш билдиргани айтилди. Асосий даъвогар сифатида Англиянинг "Ноттингем Форест" клуби кўрсатилган эди.

"La Gazzetta dello Sport" маълумотига кўра, италиялик футболчи "ўрмончилар" сафига ўтишга қизиқиш билдирмаган. Чунки жамоа Премьер-лигада жон сақлаб қолиш учун курашмоқда. Шунингдек, эҳтимолий харидорлар "Интер" талаб қилган шартларга яқинлаша олмаган. Миланликлар тўлиқ трансферни талаб қилиб, 30 миллион евро сўраган.

Давиде Фраттезининг "Интер" билан шартномаси 2028 йилгача амал қилади. Transfermarkt портали мутахассислари унинг трансфер қийматини 28 миллион евро деб баҳолаган.