"Freestyle Chess Grand Slam Paris-2025". Карлсен чемпион, Абдусатторов эса 8-ўринни эгаллади. Ҳамюртимиз қанча ишлаб олди?

7-14 апрел кунлари Франция пойтахти Париж шаҳрида "Freestyle Chess Grand Slam Paris-2025" турнири бўлиб ўтди.

Магнус Карлсен финалда Ҳикару Накамурани мағлуб этиш орқали мусобақа чемпионлигини ҳамда 200000 АҚШ доллари мукофотини қўлга киритди.

Учинчи ўрин учун кечган баҳсда Фабиано Каруана Венсан Кеймерни 1,5:0,5 ҳисобида мағлуб этди. Ушбу ғалабадан кейин Фабиано 100 минг АҚШ долларига эга чиқди. Каруана Парижда шоҳсупани эгаллаб, июль ойида Лас-Вегасда бўлиб ўтиши эълон қилинган навбатдаги ""Freestyle Chess" турнирига йўлланма олди. 

Ҳамюртимиз Нодирбек Абдусатторов турнирни 8-ўринда якунлади ва 20 000 АҚШ долларини ўзиники қилиб олди.

Эслатиб ўтамиз, Нодирбек мусобақага 1 кун қолганда таклиф қилинган эди. Абдусатторовга кейинги йирик турнирларда омад тилаб қоламиз.

Маълумот учун, Германиянинг Вайсенхаус шаҳрида бўлиб ўтган аввалги "Freestyle Chess" турнирида Абдусатторовдан ташқари, Жавоҳир Синдаров ҳам қатнашган эди. 

Ўшанда Синдаров 60 минг доллар, Абдусатторов эса 40 минг долларни ўзиники қилиб олган эди.