Футбол афсонаси танқид остида қолди

Собиқ футболчи Патрис Эвра ҳозирги “Арсенал”ни 2007–2008 йиллардаги  “Манчестер Юнайтед” билан солиштиргани сабабли Тео Уолкоттни кескин танқид қилди.

Гап шундаки, Патрис Эвра манчестерликлар шарафини ҳимоя қилган, Тео Уолкотт юлдузли онларини “канонирлар” сафида ўтказган.  

Эвра ҳазиломуз тарзда Уолкотт бу гапни айтганида “балки маст бўлган”, деди ва бундай фикрлар болалар учун нотўғри таъсир қилиши мумкинлигини таъкидлади.

Баҳс қаердан бошланди?

Бу мавзуда аввал Уайн Руни хам фикр билдирган. Ундан 2008 йилги “Манчестер Юнайтед” ҳозирги “Арсенал”га қарши ўйнаса нима бўлишини сўрашган. Руни шундай жавоб берган:

“Биз уларни осонгина мағлуб қилардик.”

Эвранинг фикри қандай?

Эвра ҳам Рунининг фикрига қўшилди. Унинг айтишича, ўша пайтда жамоада энг яхши ўйинчи Криштиану Роналду бор эди ва бу таркиб Англия футболи тарихидаги энг кучли жамоалардан бири ҳисобланарди.

Эвра шундай деди:

“Уолкотт менинг яхши дўстим, лекин у телевизорда бундай гапларни айтмаслиги керак. Бу болаларга ҳам нотўғри тушунча беради. Бизнинг 2007–08 йилги жамоамиз Премьер-лига тарихидаги энг кучли жамоалардан бири. Уни ҳозирги “Арсенал” билан солиштириш тўғри эмас.”

“Арсенал”га ҳурмат

Шу билан бирга, Эвра ҳозирги “Арсенал” жамоасига ҳурмат билдирди. Агар Микель Артета  бошқараётган жамоа лигани ютиб олса, у буни тўлиқ муносиб чемпионлик, деб ҳисоблашини айтди.

Бруну Фернандеш ҳақида

Эвра яна Бруну Фернандеш ҳақида ҳам гапириб, уни “Манчестер Юнайтед” учун жуда муҳим футболчи, деб таърифлади. Унинг айтишича, бундай даражадаги футболчи истаса бошқа катта клубларда ҳам совринлар ютиши мумкин, аммо у клуб тарихи ва масъулияти учун “Юнайтед”да қолган.