Футболчи “Барса”га қайтишдан бош тортди

Трансфер ҳуқуқи “Барселона”га тегишли ҳимоячи Сержино Дест ижара асосида ПСВ шарафини ҳимоя қилмоқда.

Америкалик футболчини Хави Эрнандес жамоадан кетказган. Дест яқинда Каталонияга қайтиш ҳақидаги саволга жавоб берди.

- Хави бор экан, мен “Барселона”га бормайман, - деди Сержино Дест Voetbal International нашрига берган интервьюсида.

23 ёшли футболчи “Аякс” тарбияланувчиси ҳисобланади. 2020 йили уни Рональд Куман “Барселона”га таклиф қилган. Бироқ жамоа бошқаруви Хави Эрнандесга ўтганидан кейин испаниялик мутахассис аввалги мураббий олиб келган ўйинчиларни секин-аста бошқа жамоаларга ўтказиб юборди.

Сержино Дест ҳам Хави келганидан кейин “Милан”га ва кейинги мавсумда ПСВга ижарага бериб юборилди. Унинг каталонияликлар билан амалдаги шартномаси бир ярим йилдан кейин якунланади.