Футболчи қизлар. Людмила Карачик янги мавсумни Беларусда бошлайдими?

Кеча Диёра Ҳабибуллаева ҳақида чиққан мақоладан сўнг, турли хил фикрларни эшитдим. Маошлар масаласи ва клубнинг молиявий аҳволи ҳақида фақатгина эшитган тахминларимни ёзган эдим. Бугун эса "Сўғдиёна - W" клубининг ашаддий рақиби "Бунёдкор - W" сардори Людмила Карачик эътирофимиз марказида.

Людмила Карачик 1994 йил 8 декабрь куни Тошкент шаҳрида дунёга келган. Болалигидан ўғил болалар билан футбол ўйнарди ва бу келажакда унинг профессионал фаолиятида катта ёрдам берди. Гап исботи билан, 15 ёшида маҳаллий "Қушбеги" жамоаси билан илк шартномасини имзолади. Кейинги йилда эса ҳужумчи U19 жамоасига чақирув олади. Бу вақтда терма жамоага Элмира Гулямова мураббийлик қилган ва ёш Людмила ҳаёти мана шу мураббийнинг қўл остида буткул ўзгариб кетишини тасаввур ҳам қила олмаган бўлса керак. Ёш футболчининг тўп билан ишлаш техникаси ва тезлиги барчани лол қолдирган, Гулямова ҳам қизалоқнинг ёрқин келажагини кўра билган.
  Футболчилик фаолияти

 "Қушбеги"дан сўнг, футболчи "Пахтакор - W" клубига йўл олади. Терма жамоадаги сифатли ўйинлари сабаб бугунги кунда ҳам академияси жуда кучли ҳисобланадиган "Металлург - W" жамоасига ўтади. Аммо турнирда пешқадам ҳисобланган "Бунёдкор - W" мураббийи Элмира Гулямова уни ўз қизлари орасида кўришни хоҳлайди ва 2019 йилда Карачик расман "қалдирғочлар" ҳужумчиси сифатида оммага таништирилади. Бу танлов қайсидир маънода ўзини оқлайди. 1 йил ўтиб, чемпионатда энг кўп гол урган тўпурарга айланди ва терма жамоа сафида ҳам 28 ўйинда майдонга тушиб, 22 та гол уришга эришади. Бу ҳолат чет давлатлари журналистларининг эътиборига тушади, 2 мавсум давомида бирорта учрашувни ўтказиб юбормаган футболчи, ваниҳоят, мамалакатнинг "Энг яхши аёл футболчиси" унвонига лойиқ топилади.
  Нега Европа таклифини рад этган?

 Аслини олганда, аёллар футболида Англиядан таклиф олиш катта орзу. Нафақат аёллар, балки эркаклар ҳам бу учун тинмай меҳнат қилади. Аммо Людмила Карачик Европада футбол Осиёдан фарқли экани, Англияда қизлар асосан кучга қараб танлангани туфайли "Эвертон" клубига рад жавобини беради. Айни вақтда Беларусь клубига ўтишга жуда яқин турган юлдузга ички чемпионатдан ҳам жуда кўп сўровлар келган, лекин Людмила "Бунёдкор"ни ҳурмат қилганлиги сабабли уларга ҳам рад жавобини беради.
  Терма жамоада нега уни кўрмаяпмиз?

 "Бунёдкор - W" клуби 2021 йилда Осиёда Ўзбекистон шарафини ҳимоя қилди, шу вақтда ҳужумчимиз Людмила Карачик оёғидан оғир жароҳат олади ва бир неча ойга сафдан чиқди. Хабарингиз бор, Ўзбекистон аёллар терма жамоасига япониялик Мидори Хонда бош мураббий этиб тайинланди ва у Карачикни 100 фоизлик даражада тайёр эмас, деб йиғинларга жалб қилмай қўйди. Ўзини ва майдондаги меҳнатини ҳурмат қилишни талаб қиладиган ҳужумчига бу умуман ёқмайди ва навбатдаги чақирувларга ўз хоҳиши билан бормай қўяди.
  Қанча маош олади?

 Людмила Карачик сайтимизга берган интервьюсида уни маош у қадар кўп қизиқтирмаслигини айтиб ўтган. Буни "Эвертон" таклифини рад этганидан ҳам билсак бўлади. Аммо пулсиз ҳам ҳеч бир инсоннинг ишлагиси келмайди. Шу туфайли қулоғимизга етиб келган "миш-миш"ларга кўра минимум 5 миллион сўмдан ортиқроқ маош олади. Бу фурболчимиз реклама ва ижтимоий тармоқлардан пул ишламайди, бунга қизиқмайди ҳам!
  Нега тўпурарлар етакчилигини қўлдан бой берди?

 Ўйлаб кўрсак, футболчининг индивидуал ютуқларида жамоанинг ҳам ҳиссаси бўлади. Карачикнинг энг юлдузли онларида "Бунёдкор" мамлакат чемпиони ва клуб сафида тажрибали футболчилар ҳам жуда кўп эди. Лекин 2022 йилда жамоада молиявий муаммолар юзага келди, жамоани 60 фоиз футболчилар тарк этди. Бу клуб натижаларига салбий таъсир кўрсатди.

                                  Дилноза Мустафоқулова тайёрлади