Футболчилардан-да қизиққон мураббийлар. Ўйиндан сўнг Тухель ҳамда Конте вазиятга изоҳ берди

АПЛ 2-туридан ўрин олган "Челси" - "Тоттенхэм" учрашуви бўлиб ўтди. Мазкур баҳсда 2:2 ҳисоби қайд этилди

Дастлаб, 19-дақиқада Кулибали ҳисобни очди. 68-дақиқа ўтиб бораётган бир пайтда Хёйбьерг мувозанатни тиклади. Бироз ўтиб, Жеймс яна "аристократлар"ни ҳисобда олдинга олиб чиққан бўлса, ўйин сўнггида Кейн жамоасини мағлубиятдан қутқариб қолган голга муаллифлик қилди.

Учрашув вақтида ва ундан сўнг ҳар иккала жамоа менежерлари Томас Тухель ҳамда Антонио Конте ўртасида келишмовчилик юзага юзага келди.

Шунингдек, "шпорлар" устози стадиондан чиқиш йўлагида Ковачич билан ҳам конфликтга борган. Маълум бўлишича, италиялик мутахассис Матеу билан тўқнашиб кетган. Шундан сўнг улар муштлашишгача борган.

Беллашувдан сўнг икки жамоа мураббийлари вазиятга изоҳ берди: 

Тухель: Ким биландир қўл бериб кўришганингизда, қаршингиздаги инсоннинг кўзига қараш керак, деб ҳисоблайман. Кейн иккинчи голни урганда, Конте жуда хурсанд эди. Тўғриси, мен бироз асабийлашдим.

Иккаламиз ҳам қизил олдикми?! Майли, бу муҳиммас. Айрим нарсаларнинг аҳамияти йўқ, аслида.

Биз ажойиб ўйин ўтказдик. Бироқ уларнинг икки голига ҳам чидаб бўлмасди. Ғалабага лойиқ фақат биз эдик. Рақиб ҳатто дурангга ҳақли эмасди.

Хаверцга нисбатан бир нечта тактик фол ишлатишди. Очиғи, Бентанкур ва Хёйбьерг неча марта бундай қилганини ҳисоблашда адашиб кетдим.

Ришарлисонда офсайд бор эди. У қолганлардан яққол ажралиб қолганди. Билмадим, ҳакамлар буни қандай пайқамади?!

Конте: Охирги ҳолатга изоҳ беришни истамайман. Бу муҳим эмас. Агар қандайдир муаммо бўлса, бу фақат мен ва у ўртасида бўлади. Бошқаларга бунинг қизиқ жойи йўқ.

"Челси"га қарши сафардаги ўйинларда доим қийинчиликка дуч келганмиз. Бироқ бу сафар биз ёмон натижа кўрсатмадик. Рақиб охирги 2 йилда ЕЧЛ ва клублар ўртасидаги жаҳон чемпионатида, шунингдек, кубок финалларида иштирок этди. Албатта, улар биздан мазкур жабҳада анча устун эди. Шундай бўлса-да, биз дуранг ўйнашга муваффақ бўлдик. Ўтган мавсум 3 ўйинда ютқазгандик, бу мавсум эса, илк тўқнашувдаёқ 1 очко қўлга киритишга эришдик. Демак, бизда ўсиш бор.

Қайд этиш лозим, "Челси" илк турда "Эвертон" устидан 1:0 ҳисобида устун келганди. Ўйиндаги ягона голга Жоржиньо муаллифлик қилган. "Тоттенхэм" эса янги мавсумнинг илк ўйинида "Саутгемптон"ни йирик 4:1 ҳисобида таслим этган. Голлар Дайер, Сессеньон ҳамда Кулусевски томонидан киритилган. Шунингдек, "авлиёлар" футболчиси Салису ўз дарвозасини ишғол этиб қўйган. 

Айни вақтда "кўклар" АПЛ турнир жадвалида етти очко тўплаган ҳолда, 7-ўринда бормоқда. Шунча очкога эга Конте шогирдлари тўплар нисбати яхшироқлиги туфайли 4-поғонани банд этган