"Ғалабамизни сенсация демаган бўлардим, бундай гол бўлишини кутмагандим" - "Пахтакор"га супер гол урган футболчи билан суҳбат

Ўзбекистон Кубоги 1\8 финали доирасида про лига вакили – Самарқанднинг “Динамо” жамоаси ўз майдонида мамлакатнинг амалдаги чемпиони – “Пахтакор”ни қабул қилди.

Рости, учрашувдан олдин ҳеч ким “Динамо” “Пахтакор”ни мусобақадан чиқариб юборишини кутмаганди. Лекин амалда самарқандликлар буни уддалай олди. Улар ўйинни шу даражада юқори тезликда ва тажовузкорликда бошладиларки, ярим соатга етмасдан “Динамо” “Пахтакор” дарвозасига 3 та гол уришга улгурди.

Иккинчи гол муаллифи Абубакр Мўйдинов бўлди. Андижонлик футболчи ёзги трансфер чоғида “Динамо”га қўшилган бўлиб, у чемпион дарвозасига шундай гол урдики, бу йил голи бўлишга номзод. Мўйдинов тўпни чап қанотдан эгаллаб олди ва ўша ернинг ўзидан тўпни тўғри дарвозанинг қарама-қарши қисмига жойлаб қўйди.

Учрашувдан сўнг Абубакр Sports.uz журналистига интервью берди.

- Абубакр, аввало сизни ва "Динамо"ни сенсацион ғалаба билан табриклайман! Айтинг-чи, бу қандай содир бўлди? Деярли ҳеч ким "Пахтакор"ни мағлуб этишингларга ишонмаганди.

- Табрик учун раҳмат. Биз бу учрашувга жуда яхши тайёргарлик кўргандик. Чунки рақиб жиддий эди ва “Пахтакор”ни синчиклаб ўрганиб чиққандик. Бу – футбол. Унда ҳамма нарса бўлиши мумкин, ўзингиз ҳам кўрдингиз.

-  Сиз ҳам бу ғалабани сенсацияга қиёслайсизми?

- Мен бундай демаган бўлардим. Биз ўйинга ҳар тарафлама тайёр эдик.

- Сизнинг голингиз ақлбовар қилмас даражада. Ростини айтинг, бундай гол ураман деб ўйламагандингиз-а? Ўшанда гол бўлишини кутмагандингиз-а ёки...

- Лекин майдонга гол ураман деб чиққандим. Бироқ, тўғриси, бундай гол бўлишини кутмагандим.

- Аслида ўша вазиятда жамоадошингизга пас узатганмидингиз ё тўғри дарвоза томон зарба йўлладингизми?

- Йўқ, тўғри дарвоза томон тепдим. Чунки зарба беришдан олдин қараганимда жарима майдони ичида бизникилардан ҳеч ким йўқ эди. Шунинг учун ўша ҳолатда таваккал қилиб тепдим.

- Голингизни ўйиндан кейин видео такрордан кўрганингизда ўзингизга қандай туюляпти?

- Ўзгача ҳиссиёт. Чунки дебют ўйинда гол уриш барибир бошқача.

-  Бу фаолиятингиздаги энг чиройли голми? Қандай таъриф берасиз?

- Чиройлиси бўлиши мумкин.

-  Тасодифий гол дея таъриф бераётганларга нима деган бўлардингиз?

- Ҳеч нима дея олмайман. Ким қандай таъриф беришни ҳамма ўзи билади.

- “Динамо”ни Ўзбекистон Кубогидаги вазифаси қандай? “Пахтакор”дек чемпион мағлуб этилгач, нимани ўйлай бошладинглар?

- Ҳамиша мақсад юқори. “Динамо”да бу учрашув тарихга айланди. Биз энди чемпионатга эътиборни қаратамиз.

- Охирги савол. Дебютингиз бундан ортиқ омадли бўлишини ўйламаган бўлсангиз керак...

- Дебютим омадли чиқди, деб айтсам бўлади. Чунки Ўзбекистоннинг энг кучли клубиин ютдик.

Шуҳратбек Жўраев.