"Галатасарой" Фалькаонинг трансфери бўйича "Монако" билан келишувга эриша олмаяпти

"Галатасарой" клуби колумбиялик ҳужумчи Радамель Фалькаонинг трансфери борасида "Монако" билан келишувга эриша олмаяпти.

L’Equipe нашри тарқатган хабарга кўра монаколиклар 33 ёшли футболчи учун 5 млн евро сўрашмоқда, аммо истанбулликлар ушбу нархни пасайтиришни хоҳлашмоқда.

Таъкидлаш керакки, Фалькаонинг ўзи турк клуби билан шахсий келишувга эришиб бўлган.

Маълумот учун, Фалькао “Монако” сафида 2013 йилдан буён тўп суриб келмоқда. У ўтган давр мобайнида 140та ўйинда майдонга тушди ва 83та гол ҳамда 14та голли узатма ёздириб қўйишга эришди.