Грандлар кутган ҳужумчи негадир "Тоттенхэм"ни танлади

Лондоннинг "Тоттенхэм" клуби "Эвертон" ва Сенегал терма жамоаси ҳужумчиси Илиман Ндиай учун курашга жиддий қўшилди. Машҳур инсайдер Фабрицио Романо маълумотига кўра, 26 ёшли футболчи Англия пойтахтига кўчиб ўтишга асосий розилигини аллақачон билдирган.

Шу билан бирга, бу эҳтимолий трансфер яна бир йирик битимга бевосита боғлиқ. Манбаларга кўра, келишув фақат битта шарти бажарилганда амалга ошади: "шпорлар"нинг бразилиялик ҳужумчиси Ришарлисон "Эвертон"га қайтишга рози бўлиши керак. У 2018–2022 йиллар орасида айнан шу клуб шарафини муваффақиятли ҳимоя қилган эди.

Мазкур жараён ортидан молиявий жиҳатлар ҳам маълум бўлмоқда. The Athletic нашри журналисти Дэвид Орнштейннинг ёзишича, "Тоттенхэм" раҳбарияти сенегаллик футболчини қўлга киритишга жуда қизиқмоқда ва унинг трансфери учун тахминан 80 миллион евро сарф этишга тайёр.