Грузиялик футболчининг хет-триги “Қизилқум”га Анталиядаги учинчи ғалабани келтирди

10 кундан буён Анталияда ўқув-машғулот йиғинини ўтаётган “Қизилқум” футболчилари кеча йиғин доирасида навбатдаги назорат учрашувни ўтказди. Навоийликларнинг бу галги рақиби Қозоғистон Премьер-лигаси вакили “Каспий” клуби бўлди.

Актауликларга қарши беллашувнинг илк дақиқалариданоқ Ҳамид Актамов шогирдлари ҳисобда олдинга чиқиб олди. Матэ Ватсадзега нисбатан ишлатилган қўполликдан кейин белгиланган пенальтини Георги Кухианидзе аниқ амалга оширди. Бўлим ўрталарига келиб, қўшниларимиз мувозанатни тиклади -1:1.

Кейинчалик, Элгужа Григалашвилида икки марта гол уриш учун яхши имконият бўлди. Биринчисида, рақиб посбони жамоасини муқаррар голдан сақлаб қолган бўлса, кейинги вазиятда грузиялик легионернинг ўнг бурчакдан йўллаган кучли зарбаси дарвоза тўсинини титратди. Биринчи бўлимга томонлар шу ҳисобда йўл олишди.

Иккинчи бўлим аввалида, яна “Қизилқум” футболчилари олдинга чиқиб олишди. Ойбек Қиличевнинг ўнг қанотдан узатиб берган тўпидан кейин рақиб ҳимоячилари пала-партишликка йўл қўйди ва Жасур Азимов вазиятда усталик билан фойдаланиб, яқин масофадан рақиб дарвозасини ишғол этди - 2:1. Орадан ўн дақиқа ўтгач, “Каспий” сардори тўп учун курашда ҳимоячи Муҳсин Убайдуллаевдан чаққонроқ ҳаракат қилди ва Нестеров билан бирга бир вазиятга чиқиб бориб, яна ҳисобни тенглаштирди. Иккинчи бўлим ўрталарига келиб Георги Кухианидзе ўзини кўрсатди. У икки дақиқа ичида икки бор рақиб дарвозабонини узоқ масофадан кучли зарбалари билан доғда қолдириб, “Қизилқум”нинг ишончли ғалабасини таъминлади.

Назорат учрашуви. 06.02.2021

“Қизилқум” (Ўзбекистон) – “Каспий” (Қозоғистон) 4:2

Анталия. “Титаник Лара” стадиони.

Голлар: Г.Кухаинидзе (3-пен, 66, 68), Ж. Азимов (50).

“Қизилқум”: Игнатий Нестеров (Артём Макосин), Файзулла Қамбаров (Азизбек Усмонов), Муҳсин Убайдуллаев, Шерали Жўраев, Салим Мустафоев, Эркин Байдуллаев, Ойбек Қиличев (Жамшид Ҳасанов), Жасур Азимов, Георги Кухианидзе, Элгужа Григалашвили (Беҳруз Саъдиллоев), Матэ Вацадзе.