Gvardiola Abduqodir Husanov haqida: "U juda yuqori darajada, "Siti" unga yillar davomida tayanadi"

"Manchester Siti" bosh murabbiyi Xosep Gvardiola Abduqodir Husanovning oʻyini va professionallligiga yuksak baho berdi.

"Matbuotni oʻqib koʻrdim, Husanovni qanday maqtashayotganini. Ular haq! U juda yuqori darajada. Bizda unga nisbatan hech qanday eʼtiroz yoʻq. Oxirgi oʻyinda ham, undan oldingisida ham u ajoyib harakat qildi. Biz juda mamnunmiz.

Ayniqsa, u "Arsenal"ga qarshi oʻyindan keyin bir oy davomida maydonga tushmaganiga qaramay, mashgʻulotlarda va kiyim almashtirish xonasida oʻzini qanday tutganini koʻrsangiz edi. Ana shu jihat Husanovni belgilab beradi. Men bunga uning ota-onasi bergan tarbiya, Oʻzbekistonda olgan asosi, keyin Fransiyada oʻtkazgan oylari katta taʼsir qilganiga ishonaman. Shundan keyin u toʻgʻridan-toʻgʻri Premyer ligadagi "Manchester Siti"ga keldi. Bu esa juda katta va oson boʻlmagan oʻzgarish.

Lekin u tingladi, oʻrgandi. Albatta, uning jismoniy holati juda yuqori darajada. "Manchester Siti"da markaziy himoyachi sifatida koʻp yillar davomida oʻynaydi va eng yuqori saviyada. U qanday darajaga chiqadi? Bu faqat uning oʻzigа bogʻliq, boshqa hech kimga emas", — deya taʼrif berib oʻtdi ispaniyalik murabbiy.