Gvardiola de Bryuyne bilan xayrlashuv, Rodrining qaytayotgani va "Manchester Siti"ning ChL uchun kurashi haqida gapirdi

"Manchester Siti" bosh murabbiyi Xosep Gvardiola Angliya Premer-ligasining 37-turi doirasida "Bornmut”ga qarshi o‘yin (3:1)dan so‘ng o‘z fikrlarini bildirdi. 
  
De Bryuyne bilan xayrlashuv marosimi haqida: 
  
"Menda turli his-tuyg‘ular bor edi. Bir tomondan – qayg‘u, chunki u biz uchun juda muhim shaxs bo‘lgan. Ikkinchi tomondan – baxt, chunki men va hamma uning muxlislarimiz bilan qanday aloqada bo‘lganini his qildik. U shu bog‘lanishga har doim ega bo‘lgan va bo‘ladi".  
  
So‘nggi uchrashuv va Chempionlari ligasi yo‘llanmasi uchun kurash haqida: 
  
"Eng muhimi – g‘alaba qozonish edi, biz bunga erishdik. Raqib ajoyib o‘yin ko‘rsatdi. Endi oldimizda yana katta ish turibdi. Oxirgi turda kuchli raqib – "Fulxem"ga qarshi o‘ynaymiz. U erga faqat g‘alaba uchun yoki kerakli 1 ochko olish uchun boramiz". 
  
Niko Gonsales va Rodri haqida: 
  
"Niko – ajoyib yigit. U yarim himoyada turli pozitsiyalarda o‘ynay oladi, oldinga ham chiqadi. Bugun u ajoyib gol urdi. 
  
Rodrining qaytishi ham yaxshi yangilik. U hali to‘liq tiklanmagan, tiklanish jarayoni davom etadi. Rodriga hali oylar kerak, lekin birinchi qadam tashlandi" - deya ta’rif berib o‘tdi Gvardiola "Sky Sports" efirida. 
 
Ma’lumot o‘rnida, ispaniyalik mutaxassis qo‘l ostidagi "shaharliklar" APLda 37 ta turdan so‘ng 68 ochko to‘plab, 3-o‘rinni egalladi.