Гвардиола: "Мен мураббийлик ишини соғинмайман, ҳаётни қайтадан кашф этмоқчиман"

«Манчестер Сити» ва «Барселона» клубларининг собиқ бош мураббийи Хосеп Гвардиола ҳозирги кунда мураббийлик фаолиятини умуман соғинмаётганини айтди. Эслатиб ўтамиз, испаниялик мутахассис ўтган мавсум якунлангач «шаҳарликлар» жамоасини тарк этган эди.

«Руҳий жиҳатдан менда соғиниш йўқ. 37 ёшимдан мураббийликка киришганман, бутун ҳаётим футбол билан боғлиқ бўлган. Энди эса ўзим учун бошқа бир ҳаётни кашф этгим келяпти, футболдан ташқари бирор иш билан шуғулланиб, шу орқали бахтли бўлишни истаяпман. Ўз ишимни яхши кўраман, лекин шундай палла келадики, танаффус кераклигини ҳис қиласан. Балки бир куни уйғониб: «Майли, яна мураббийликка қайтишни истаяпман», дерман. Лекин бу қарорга келишим учун аввал шу ишни соғинишим керак, ҳозир эса бундай ҳис туйғу йўқ», — дейди Гвардиола.

Унинг сўзларига кўра, айни пайтда у ўзининг янги ҳаёти қандай бўлишини англаб етишга ҳаракат қилмоқда.

«Тўхташ ҳақидаги қароримга келдим, чунки ўзимга кўпроқ эътибор қаратмоқчиман. Фарзандларим ва 95 ёшга кирган отам билан кўпроқ вақт ўтказишни истайман, у ҳали ҳам ҳаёт. Менинг ёшим 56 да, энди ёш эмасман, дунёқарашим бироз ўзгарди. Ҳали-ҳануз мураббийликдан кейинги ҳаётга кўникаяпман, лекин ҳозирча ҳаммаси жуда ёмон эмас», — дея Гвардиоланинг сўзларини келтиради Sky Sport Italia.

Айни пайтда бир рассом Гвардиола ва «Сити»нинг 11 нафар футболчисини бир вақтнинг ўзида тасвирлаган картина яратгани ҳам маълум қилинди.