Гвардиола нега “Манчестер Сити”дан кетишини айтди

“Манчестер Сити” бош мураббийи Пеп Гвардиола жорий мавсум якунланганидан сўнг клубни тарк этишини расман тасдиқлади.

Испаниялик мутахассис клубдаги 10 йиллик фаолияти давомида 20 та йирик совринни қўлга киритди. Улар қаторида олтита Англия Премьер-лигаси чемпионлиги ҳамда Чемпионлар лигаси ғолиблиги ҳам бор.

55 ёшли мураббийнинг клуб бошқарувидаги сўнгги учрашуви якшанба куни “Этиҳод” стадионида “Астон Вилла”га қарши баҳс бўлади.

Гвардиоланинг клуб ривожига қўшган улкан ҳиссаси шарафига “Манчестер Сити”нинг янги қурилган шимолий трибунаси унинг номи билан аталади. Ушбу трибуна айнан мураббийнинг сўнгги ўйинида илк бор тўлиқ фойдаланишга топширилади.

Гвардиола кетиш сабаби ҳақида шундай деди:

“Нега кетаётганимни сўраманг. Аниқ бир сабаб йўқ, аммо қалбимда бунинг вақти келганини ҳис қиляпман. Ҳеч нарса абадий эмас. Агар абадий бўлганида, мен шу ерда қолардим. Абадий бўладиган нарса –  ҳис-туйғулар, инсонлар, хотиралар ва менинг “Манчестер Сити”га бўлган муҳаббатимдир”.

Аввалроқ BBC Sport нашри “Манчестер Сити” Гвардиоланинг кетишига тайёргарликни унинг шартномаси тугашидан бир йил олдин бошлаганини хабар қилган эди.

Мураббий ўрнини эгаллаш учун асосий номзод сифатида “Челси”нинг собиқ бош мураббийи Энцо Мареска кўрилмоқда. У аввалроқ Гвардиола штабида фаолият юритган.

Гвардиоланинг кетиши ҳақидаги хабар клубнинг Премьер-лига чемпионлиги учун курашда “Арсенал”га имкониятни бой берганидан уч кун ўтиб эълон қилинди.

Шунга қарамай, Гвардиола ўзининг сўнгги мавсумида жамоани Англия кубоги ва Лига кубоги ғалабалари сари етаклади.