Гвардиола қаерда ишлаши бўйича якуний қарорини айтди

Жорий мавсумни қийин бошлаганига қарамай, Англия лигаси кубоги ва Англия кубогини қўлга киритган “Манчестер Сити” бош мураббийи Хосеп Гвардиола клубдаги келажаги ҳақида фикр билдирди.

- Келаси мавсумда “Сити”да ишлайманми? Ҳа. Менинг амалдаги шартномам бор. Кўпчилик мендан бу ҳақда сўрайди, аммо мен ўзим учун жавобни аллақачон биламан. Сизлар ҳам уни яхши биласизлар, - деди Хосеп Гвардиола The Touchline нашрига берган интервьюсида.

Гвардиола “Манчестер Сити”ни 2016 йил ёзидан бери бошқариб келмоқда ва ҳозирга қадар ўз жамоаси билан жами 20 та совринга эга чиққан.

Испаниялик мутахассис олти марта Англия Премьер-лигасида ғолиб чиқди, беш марта Англия лигаси кубоги, уч мартадан Англия кубоги ва Суперкубогини қўлга киритди.

Шунингдек, “Манчестер Сити” бир мартадан Европа Чемпионлар лигаси, УЕФА Суперкубоги ва ФИФАнинг клублар ўртасидаги жаҳон чемпионатини ютган.

Эслатиб ўтамиз, европа оммавий ахборот воситаларида Хосеп Гвардиола жорий мавсум якунланиши билан жамоани тарк этиши, уни ўрнига "шаҳарликлар" Энцо Мареска ёкм Венсан Компанини олиб келмоқчи экани ҳақида жуда кўп маълумот чиқарган эди.