Гвардиола: "Сити" келажак учун янги жамоа қурмоқда

"Манчестер Сити" бош мураббийи Хосеп Гвардиола жорий мавсум бўйича дастлабки хулосаларини билдирди.

Бугун "шаҳарликлар" Лондонда "Челси"ни мағлуб этса, Премьер-лига жадвалида "Арсенал" билан орадаги фарқни 6 очкога қисқартириши мумкин. Кейинги турда эса "Сити" ўз майдонида "канонирлар"ни қабул қилади.

Гвардиола жамоа ҳозирча энг яхши ўйинини кўрсата олмаётганини, бу эса таркибдаги катта ўзгаришлар билан боғлиқ эканини таъкидлади.

"Бу мавсумда биз кутилганидек ўйнаётганимиз йўқ. Аммо таркибимиз жиддий ўзгарди, кўплаб янги футболчилар келди. Биз келажак учун жамоа қуряпмиз. Олдинда янада кучлироқ бўламиз ва Премьер-лигада чемпионлик учун курашни давом эттирамиз", — деди испаниялик мутахассис матбуот анжуманида.

Айни пайтда, турли миш-мишларга кўра, Гвардиола келаси ёзда ўз лавозимини тарк этиши мумкин. Ҳолбуки, унинг амалдаги шартномаси кейинги мавсум якунигача мўлжалланган.