Гвардиола Холанднинг сафга қайтиш муддати ҳақида маълумот берди

Хосеп Гвардиола Эрлинг Холанднинг жароҳат туфайли 5-7 ҳафтага сафдан чиққанини маълум қилди.

Норвегиялик футболчи мавсумнинг қолган қисмини деярли тўлиқ ўтказиб юбориши кутилган эди. Бироқ, унинг 15 июндан 13 июлгача АҚШда бўлиб ўтадиган клублар жаҳон чемпионатига қадар тузалиши тахмин қилинмоқда.

- Жорий мавсумда юз берган барча жароҳатларни ҳисобга олсак, футболчиларимиз ва Эрлингга жуда ачинаман. Унга тезроқ соғайиб, майдонга қайтишини тилайман.

- У қачон қайтиши мумкин?

- Шифокорлар менга беш ҳафтадан етти ҳафтагача вақт керак бўлишини айтди. Умид қиламанки, мавсум охиригача ва клублар жаҳон чемпионатига қадар у таркибда бўлади, - деди "Сити" бош мураббийи.

Маълумот учун, "шаҳарликлар"нинг 24 ёшли ҳужумчиси Англия кубоги 1/4 финалида "Борнмут"га қарши ўйинда (2:1) чап тўпиғидан жароҳат олди.