"Ҳа, Нефтчи" билан гаплашганмиз, бироқ..." - Йован Жокич "Навбаҳор"да қоладими ёки бошқа танловни амалга оширадими?

“Навбаҳор” клубининг энг муҳим ўйинчиларидан бири сербиялик Йован Жокич. У рақиб ҳужумларини бузишда ва жамоасининг ҳужумларини бошлашда доим фаол. Наманганликлар сафида иккинчи мавсумини ўтказган таянч ярим ҳимоячиси ўзига билдирилган ишончларни оқлади.

2023 йилда у Ўзбекистон чемпионати ва Кубок баҳсларида ҳаммаси бўлиб, 26 та ўйинда майдонга тушиб рақиблар дарвозасини 3 марта ишғол этди. Осиё Чемпионлар лигасида ҳам у барқарор ўйин намойиш қилди.

Албатта, бундай яхши савиядаги ўйинчига талабгорлар бўлиши одатий ҳол. Бунинг устига Жокичнинг “Навбаҳор” билан тузган шартномаси тугаяпти. Шулардан келиб чиққан ҳолда Sports.uz журналисти сербиялик легионер билан суҳбатлашди.

- Йован, эшитишимга қараганда, сиз “Навбаҳор”дан кетмоқчисиз? Шу гаплар тўғрими?

- Ҳа, “Навбаҳор” билан тузган шартномам ниҳоясига етди. Аммо кейин нима бўлади, буни вақт кўрсатади.

- Бундан ташқари, “Нефтчи” клуби томонидан сизга жиддий қизиқиш борлиги ҳам ростми?

- Албатта, улар билан гаплашганмиз, бироқ юқорида қайд этиб ўтганимдек, ҳаммасини вақт кўрсатади.

- “Навбаҳор” бу мавсумда ҳам чемпионликни қўлга кирита олмади. Жамоа потенциали чемпионлик учун етарли бўлмади, деб ўйлайсизми?

- Бу йил “Навбаҳор” яхши жамоа эканлигини кўрсата олди, аммо унвонга эга чиқишимиз учун бизга бироз омад етишмади.

- Ўзбекистон чемпионатида сиз ўйнайдиган позицияда қайси футболчилар кучли?

- Ўйлайманки, мен тўп сурадиган чизиқда яхши футболчилар кўп. Шу боис фалончи уларнинг орасида энг зўри, деб кўрсата олмайман.

- Самвел Бабаян билан гаплашдингизми? Кейинги йили “Навбаҳор”ни қандай тасаввур қиляпсиз?

- “Навбаҳор” ҳар доим чемпион бўлиш учун курашади. Чунки у яхши жамоа ва бу ҳолат айниқса, уй ўйинида яққол намоён бўлади. Футболчилар учун мухлислар билан тўлиб-тошган стадионда тўп суриш жудаям ёқимли.

- Неймар ва “Ал-Ҳилол”га қарши ўйинлардан қандай хотиралар қолди?

- Афсуски, Неймарга қарши ўйнаш насиб қилмади, бироқ “Ал-Ҳилол” зўр жамоа ва унинг таркибида ажойиб футболчилар кўп. Улар билан майдонда тўп суриш - мен учун бошқача бўлади. Бу ўзим қарши ўйнашга тўғри келган энг зўр футболчилардир.

- Сизнингча, “Навбаҳор” ОЧЛда қаергача бора олади?

- ОЧЛда ўзбек жамоалари ҳар қандай рақибга қарши ўйнай оладилар. Шундай экан, “Навбаҳор”да ушбу турнирда ўзини кўрсата олиши учун ҳамма нарса етарли.

- Хизматингизга бошқа мамлакатлардан ҳам таклифлар борми?

- Бошқа чорловлар йўқ эмас, аммо бу ҳақда гапира олмайман.

Шуҳратбек Жўраев.