Ҳабиб -Гэтжи кимнинг имконияти юқори? Ўзбекистонлик ММА олами вакиллари жавоб берди

24 октябрь куни енгил вазн тоифаси чемпиони Ҳабиб Нурмагомедов ва вақтинчалик чемпион Жастин Гэтжи “UFC 254” турнири доирасида ўзаро тўқнаш келишади. Жангнинг муҳимлик даражаси жуда юқори. Чунки, мазкур қарама-қаршилик ғолиби нафақат дивизионнинг балки, “Pound for pound” етакчисига ҳам айланади, деб бемалол айта оламиз. Хуллас, жуда қизиқарли жанг кутиб турибди. Биз UFCнинг “катта» жанглари ҳақидаги тобора анъанага айланиб бораётган ўзбек ММА олами вакилларининг фикри билан яна қизиқдик. Қуйида билдирилган мулоҳазаларни эътборингизга ҳавола этамиз.

Жаҳонгир Қорабоев – мураббий

-  “Стойка”да Жастин Гэтжи кучлироқ. Бунга унинг жангларини томоша қилсангиз ҳам гувоҳ бўласиз. Фергюсонга қарши жангги янада унинг маҳорати ошганлигини кўрсатди. Шундай бўлса-да, Ҳабиб ўз ишини қилади. Нурмагомедовга мухлислик қиламан ва унинг ғалаба қозонишига тилакдошман.

Бекзод Абдураҳмонов – эркин курашчи ва ММА жангчиси

-  Ҳар иккиси учун жуда қийин жанг бўлади. Ҳабиб учун қийин жиҳати, Гэтжини ўзи ҳам курашдан чиққан. АҚШда яхши натижалар кўрсатган. Ҳабибга қарши жангга тайёргарлик жараёнида янада курашини кучайтиришига шубҳа йўқ. Грэпплинг борасида ҳам ёмон эмас, “стойка”сига эса гап йўқ! Ҳабибни кучли жиҳатини барча яхши билади. Имкониятлар 50/50. Агар, биринчи ва иккинчи раундларда Ҳабиб “тэйкдаун”лар билан Гэтжини чарчата олса, қолган раундларда ҳам у устунлик қилади. Агар, буни уддасидан чиқмаса, Гэтжи “стойка”даги устунлиги эвазига ғалаба қозониши ҳам мумкин.

Даврон Файзиев –журналист

- Ҳабиб-Гэтжи жанги... Жастин Гэтжини битта ишига қойил қолганман. Яъни баъзаси кураш бўлса-да, UFCда кучли зарбали, нокаутчи сифатида танилган. Агар, унинг фаолиятини илк босқичига эътибор қаратмасангиз, камида боксчи ёки кикбоксингчи бўлса, керак деб ўйлашингиз мумкин. Аслида, у курашчи сифатида профессионал даражага эга. Шунинг учун, бу Ҳабибга мураккаб рақиб бўлади. Сабаби, табиийки Ҳабиб уни “партер”га тортмоқчи бўлади. У ерда эса Гэтжи ўзи учун қулай атмосферани ҳосил қилади. Шунинг учун, “стойка”да урушса, Гэтжи кичик фаворит, курашга тортса, Ҳабиб аввалги рақиблари билан бўлган жангдаги каби яққол фаворитга айланиб қолмайди. Мисол учун, Конор Ҳабибга қарши битта хатога йўл қўйганки, кўп вазиятларда таваккал қилмаган. Эҳтиёткорлик билан ва тактикани устун қўйган. Гэтжи ундай жангчи эмас, у таваккалчи, қийин вазият юзага келадиган бўлса, вабанкка боради ва очиқ жангга киришиб кетиши мумкин. Бу Гэтжининг плюс тарафлари... Энди, Ҳабибнинг плюс тарафлари: у умумий, универсал жангчи сифатида даражаси юқорироқ. Гарчи, ёшида катта фарқ бўлмаса ҳам, айнан, профессионал иштироки бўйича тафовут жуда катта. Ҳабибнинг октагонда фикрлаши, ақлли жанг олиб бориши ва оддийгина оладиган бўлсак, жисмоний куч жиҳатидан устун.

-  Мана иккисининг плюс томонларини таҳлил қилдик. Энди, уларни солиштириб, ким фаворит эканлигини ҳар бир мухлис ўзи аниқлаб олиши мумкин. Шахсан мен учун фоиз нуқтаи назардан оладиган бўлсак, 55/45 Ҳабиб фойдасига!

Фарруҳ Мадаминов – мураббий

-  Ҳабиб рақибига нисбатан анчагина кучли... “Партер”да қийнаб, чарчатиб, ҳар доимгидек ғалаба қозонади. Гэтжини “стойка”сини гапиришмоқдаю, ундан кучли бўлган рақибларга ҳам Нурмагомедов хеч қандай имконият қолдирмаган. Мисол учун, Дастин Порье ўша вақт Гэтжи даражасида эди. Эҳтимол, ундан ҳам яхшироқ бўлгандир. Гэтжи-Порье ўртасидаги ўзаро жангда Порье ғалаба қозонгонлиги ҳам бунга мисол бўла олади. Қисқа қилиб айтганда Ҳабиб Нурмагомедов ғалаба қозонади.

Жасур Алижонов –  мураббий

-  Булар ўртасидаги тўқнашувда ким ғалаба қозонишини тахмин қилиш жуда қийин. Бир-бирига жуда мос рақиблар. Ҳар иккиси бир-бири учун ноқулай... Гэтжида ҳам ғалаба қозониш имконияти мавжуд. Унинг боксдаги маҳорати жуда зўр ва курашда ҳам ёмон эмас. Имкониятларни билмадимкуя, лекин ажойиб жанг бизни кутиб турибди.

Мансур Тўғизбоев – ММА жангчиси ва рефере

-  Жанг қандай боришига боғлиқ бўлади. Қайси бири ўз тактикасини ўтказиб, жангнинг боришини назорат қила олса, ўша ғалаба қозонади. Гэтжи тик туриб, жанг олиб боришда беназир. Шунинг учун, жанг шу тактикада кечса, Гэтжида ҳеч кимда бўлмаётган яъни, Ҳабиб Нурмагомедовдан устун келиш имконияти пайдо бўлади.  Лекин бу жуда қийин бўлади. Чунки, Ҳабибда улкан тажриба ва салоҳият мавжуд.

 Лиля Шакирова –ММА жангчиси, GFC чемпиони

- Мен ўйлайманки, амалдаги чемпион Ҳабиб Нурмагомедов бу сафар ҳам ғалаба қозонади. Тўғри, Гэтжи ҳам ажойиб жангчи. Бироқ Нурмагомедов барибир ундан кучлироқ.

Ҳумоюн Ибрагимов -  ММА жангчиси

-  Ҳабибнинг фаолиятидаги энг қийин жанг бўлади. Жастинда нокаут қиладиган куч бор ва унинг”партер”да ҳам юқори даражада ҳаркат қила олади. Фақат бу жангда кардио барчасини ҳал қилади. Жанг ғолиби эса, Ҳабиб бўлади. Тахминан учинчи раундда “сабмишн” (бўғиш услуби) билан ғалаба қозонади.

Наимжон Тўхтабоев – Бирман бокси бўйича “World Letvey Champion”лик камари соҳиби

-  Бу сафар Ҳабиб Нурмагомедовга жуда қийин бўлади. Сабаби, унда руҳий жиҳатидан камчилик бўлиши мумкин. Барчага маълум, яқинда отаси ва мураббийи Абдулманап Нурмагомедов вафот этганди. Шу омил ҳам унга ҳалақит бериши мумкин. Агар, бу жангда ҳам Ҳабиб ғалаба қозона олса, у юксак матонат эгаси эканлигини яна бир бор исботлайди.

Ўғилой Насимова- ММА жангчиси

-  Ҳар иккиси ҳам кучли жангчилар. Бекорга ўз вазн тоифасининг етакчиларига айланишгани йўқ. Ҳақиқатдан ҳам маҳоратлари қолган рақибларидан бир бош баланд эканликлари учун улар рейтингни бошқаришмоқда ва камарларни қўлга киритишган. Аммо устунлик барибир Ҳабиб томонида бўлади. У бироз Гэтжига қараганда кучлироқ. Агар, Ҳабиб ўз услубини ўтказиб, “стойка”да хатоликка йўл қўймаса, шубҳасиз, Ҳабиб ғалаба қозонади.

Мавлуд Тифиев – “Thai Fight” чемпиони

-  Ҳабиб Нурмагомедов анчагина кучли ва у ғалаба қозонади. Жанг, “партер”да бўлади. Чунки, Ҳабиб биладику унинг кучли жиҳатини!  Шундай экан, ғалаба қозониши муқаррар бўлган, услубида ҳаракат қилади-да... Гэтжини чарчатиб ташлайди. Узоғи билан 3-4 раундда жанг якунланади.