Ҳаким Фузайлов: "Албатта, сиз уларни бир вақтда майдонда кўрасиз!"

Про лиганинг 17-турида “Бухоро” дербида “Ғиждувон”ни 2:0 ҳисобида енгди. Ўйиндан кейин “Бухоро” бош мураббийи Ҳаким Фузайлов ўз фикрларини билдирди.

“Ғалаба қозониш ҳардоим ҳам ёқимли. Лекин жамоамиз яна катта устунликка эришиб, кўплаб вазиятларни кўкка совуряпти. Биринчи таймнинг ўзидаги вазиятларимизни голга айлантира олганимизда ҳисоб йирик кўринишга келарди.

Йигитларда озгина совуққонлик етишмаяпти, назаримда. Бу борада машғулотларда қаттиқ меҳнат қиламиз, бошқа йўлимиз ҳам йўқ. Йигитларга курашганлари ва муҳим 3 очкони қўлга киритганлари учун ташаккур. Курашишда давом этамиз.

Биринчи бўлимдан фарқли ўлароқ, иккинчи бўлимда ҳисобдан келиб чиқиб қарши ҳужумда ўйнагандек таассурот уйғотгандир, лекин бу футболчиларнинг “психологияси” билан боғлиқ ҳол.

Нима бўлган тақдирда ҳам тўп билан муомала қилиш борасида устунлик биз томонда бўлди. Ҳақиқий “бухороча” дербига гувоҳ бўлдик.

Рўзимбой Аҳмедов ва Сонг Лонгжини бир вақтда майдонга тушишини кўришимиз мумкинми? Ҳа, мумкин! Турнирнинг асосий палласи яқинлашмоқда, сиз уларни бир вақтда, майдонда албатта кўрасиз”, - деди Ҳаким Қаюмович.

“Бухоро” матбуот хизмати.