Ҳаким Зиеш: Бу кунни узоқ кутдим

«Челси» клубининг жорий йил февраль ойида «Аякс» билан ярим ҳимоячи Ҳаким Зиешнинг трансфери борасида келишувга эришиб олганидан кўпчиликнинг хабари бор, албатта. Ўшанда «Кўклар» жамоаси марокашлик футболчи билан 5 йиллик шартнома имзоланганини ва у июль ойи аввалида расман клуб сафига келиб қўшилишини эълон қилганди.

Кутилганидек, Зиеш бир неча кун олдин «Челси» ихтиёрига келиб қўшилди ва клуб каналининг мухбирига интервью берди.

- Бу мен учун кўп нарсани англатади. Ёш бола пайтингда сен ҳар доим топ-клублар учун ўйнашни орзу қиласан. Премьер-лига, албатта муҳим омил саналади. Агар «Кўклар» жамоаси тарихига, бу ерда қандай ўйинчиларнинг тўп сурганига қарайдиган бўлсак, «Челси» доимо катта клуб бўлган, дейиш мумкин. Мен бахтлиман.  Клуб учун ўйнашни сабрсизлик билан кутяпман. Бу дамларни узоқ кутдим, тахминан 4-5 ой ва ниҳоят мана, шу ердаман.

«Херенвен» ёшлар жамоасида шуғулланиб юрган кезларимни яхши эслайман ва биз бир неча жамоадошларим билан бирга «Челси»га мухлислик қилганмиз. Ўша вақтларда бу ерда Дидье Дрогба, Фрэнк Лэмпард, Жон Терри ва клуб учун жуда муҳим бўлган бошқа ижрочилар тўп сурган. Буларнинг барчасини англаган ҳолда ҳозир бу ерда туриш – ақлга сиғмайди, бу мен учун жуда муҳим, - деди Зиеш.