Ҳамиджон Актамов: Футболчилар пул учун ўйнашади, чунки уларнинг иши шу

«Қизилқум» жамоаси Суперлиганинг охирги турида сафарда «Андижон»га қарши баҳс олиб борди. Ушбу учрашув эса икки кун давом этди. 30 ноябрь куни бошланган ўйин 1 декабрь куни ниҳоясига етди. Албатта, бунинг сабабини энди барча яхши билади. Боиси, кеча қуюқ туман тушганлиги сабабли «Андижон» - «Қизилқум» жамоалари ўртасидаги учрашув 52-дақиқада тўхтатилганди. Натижада учрашувни давом эттиришнинг имкони бўлмагани сабабли беллашув 1 декабрь кунига қолдирилди. Натижада бугун 52-дақиқадан бошлаб ўйин давом эттирилди. Учрашув тақдирини эса ягона гол ҳал қилди ва «Қизилқум» мағлубиятга учради. Навоийликлар бош мураббийи Ҳамиджон Актамовга эса бир қатор саволлар билан мурожаат қилдик.

- «Андижон»га қарши ўйин ҳақидаги фикрларингиз қандай?

- Андижонга ютиш учун келгандик. Аммо озгина сарсон-саргардончилик бўлди. Лекин бу мағлубиятимиз учун баҳона бўла олмайди. Умуман олганда, яхши ўйин бўлди. Иккала дарвозага ўйин давомида битта тўғри зарба берилди ва бу ўйин тақдирини ҳал қилди. Шунчаки рақиб жамоа тўғри тепди ва гол бўлди. Бизнинг зарбаларимиз эса гол бўлмади. Ҳаттоки, тўғри тепа олмадик ҳам.

- Кеча ўйин пайтида қуюқ туман тушганлиги боис учрашув қолдирилди ва бу ҳолат ҳам жамоангизга ўз таъсирини кўрсатдими?

- Йўқ, бунинг фарқи нима? Барибир ўйин яна қолдирилса ҳам футболчиларимиз майдонга чиқиб ўйнайверишади. Чунки ўйинчилар бутун мавсум давомида формада бўлишади. Улар доим ўйинга тайёр. Эртага чиқиб ҳам яна ўйнайверишади. Шунчаки, бу ҳолат биз учун мағлубиятимизга сабаб бўла олмайди. Бугун 38 дақиқа ўйнадик ва омад мезбонларга  кулиб боқди. Лекин ўйин давомида «Андижон» ҳам, биз ҳам бирор нимани қойиллатиб қўйганимиз йўқ.

- Мавсум якунига кўра жамоангиз 13-ўрин билан чекланди. Шундай экан, бу йилги чемпионат ҳақида нима деган бўлардингиз?

- Биз 13 эмас, 12-ўринни олдик. Рости, бу йил жуда ҳам қийналдик. Майли, бир ундай, бир бундай бўлиб туради. Бу йилги камчиликларимизга қараймиз ва қаерда хато қилганимизни тўғрилашга ҳаракат қиламиз. Албатта, келаси йили муносиб қатнашишга ҳаракат қиламиз. Ўтган йили 8-ўринни олгандик, бу йил эса афсуски 12-ўрин билан чекландик. Бундай натижа жуда аламли. Лекин буларнинг барчасига сабаб бор.

- «Қизилқум»да молиявий муаммолар кўплиги ҳақида эшитгандик. Шу ҳолат асосий сабаб бўлдими?

- Молиявий жиҳат деймиз-у, лекин бу баҳона бўлиб қолади. Барибир футболчи ўзининг профессионал ишини қилиши керак. Ҳеч кимнинг пули ҳеч қачон тўланмай қолиб кетмайди. Озгина узилишлар бўлган тақдирда ҳам барибир ҳаммаси охиригача тўланади ва тўлангани ҳам бор. Яна қайтараман, футболчи барибир ўзининг профессионал ишини қилиши керак. Ўйинчиларимга молиявий ҳолат таъсир қилди деб айта олмайман. Балки қайсидир жиҳат бўйича йигитларга руҳий томондан таъсир қилган бўлиши ҳам мумкин. Улар футболчи бўлишгани боис фақат пул учун ўйнашади. Чунки уларнинг иши шу. Шу кунларда барча қарздорликларни ҳал қилишга ҳаракат қиламиз, ҳеч кимнинг пули қолиб кетмайди.