Ҳамма ғалабага ташна...ми ёхуд Суперлигада томошабоп тўқнашувларга тайёрмисиз?

Бугун Суперлиганинг 9-турига старт берилади. Уч кун мобайнида 8 та жуфтлик иштирокидаги қизиқарли ўйинларга гувоҳ бўламиз.

22 апрель

18:00. “Сурхон” – “Машъал”

Шу кунгача барча ўйинларида ютқазаётган ва рақибларига эринмасдан очколарни улашиб келаётган яққол аутсайдер – “Машъал” бу сафар энди Термизда “Сурхон”га қарши майдонга тушади. “Сурхон” ҳам муборакликларни кутаётган бўлиши аниқ. Нима ҳам деймиз? Ўйин олдидан иккала клубда имкониятлар тенг. Бироқ натижалардаги статистикаларда тафовут катта. “Машъал”да ҳеч нарса ўхшамаяпти, Термизда нима бўларкин?

20:15. “Бухоро” – “Пахтакор”

Турнинг марказий ўйинларидан бири. Ўтган йили бу жамоалар Кубок финалида ҳам тўқнаш келишган. Александр Хомяков ўз жамоасини етакчиларга қарши қандай тайёрлашни яхши биладиган мутахассис. Бу йил “Бухоро” яхши таассурот қолдиряпти. Иккала клубни мураккаб учрашув кутиб турибди. Ўзаро ўйинлардаги статистикада “Пахтакор” яққол фаворит. “Бухоро”нинг стандартлари жуда хавфли тус олмоқда. Жамоалар эхтиёткорликни ҳам асло унутишмайди.

23 апрель.

19:00. “Насаф” – “Локомотив”

Илк бор номинал мезбон сифатида Қўқондаги стадиондан фойдаланадиган “Насаф” “Локомотив”ни қабул қилади. Аслида иккала жамоа ҳам меҳмон. Агар “Насаф” Қаршида мухлислари кўз ўнгида ўйнаганида маълум бир ҳолатда уларнинг устунлиги ошган бўларди. Аммо Қўқонда иккала клуб ҳам бир хил шароитда бўлади. Лекин қизиқарли учрашув бўлиши шубҳасиз. Класс жиҳатидан яхши ижрочиларга эга жамоаларнинг тўқнашуви албатта қизиқарли кўриниш олади.

19:00. “Навбаҳор” – “Сўғдиёна”

“Сўғдиёна” “Навбаҳор” учун кўпинча ноқулай рақиб саналади. Улуғбек Бақоев ва унинг жамоаси наманганликларга қарши айниқса, Наманганда ижобий натижаларга эришишган. Бироқ бу сафарги учрашув Тошкентда ўтади. Қолаверса, Бақоев яна Жиззахга қайтгани билан ҳали натижалар у қадар ижобий эмас ва барқарорлик кузатилмаяпти. “Навбаҳор” эса аксинча, ўз йўлига тушиб олди ва бежизга учинчи поғонада эмас. Албатта, фаворит “Навбаҳор”.

20:15. “Динамо” – ОКМК

Охирги иккита турда “Динамо”да мағлубият, ОКМКда эса ғалаба. Демак, жамоаларда руҳият ва кайфият ҳам шунга яраша. Аслида бу мавсумда иккала жамоа ҳам ҳозирча ўзига ўхшамаяпти. Лекин Самарқандда молиявий муаммолар борлиги натижаларга таъсирини кўрсатмасдан қолмаяпти. Таркиби анча ёшарган ОКМК эса аста-секин ўз ўйинини топаётгандек ва бу сўнгги турларда сезиляпти. “Динамо”да қора чизиқ кўриняпти.

24 апрель

19:00. “Хоразм” – “Нефтчи”

Футбол ўйнашни яхши кўрадиган “Хоразм”ни жиддий имтиҳон кутяпти. Амалдаги чемпион ва етакчилардан бири “Нефтчи”га қарши ўйин урганчликлар учун ўзгача аҳамият касб этади. Турнир жадвалида “Хоразм”нинг 7-ўринда кетаётгани ва унинг олдида бир қанча тажрибали жамоаларнинг ҳали натижаларини яхшилай олмаётгани фонида “Хоразм” анча қизиқарли ва тажовузкор клуб сифатида кўринмоқда. "Нефтчи”га қарши ўйин томошабоп ва балки очиқ футбол кўринишида ўтар. Балки қачонки гол урилгач жамоалар очиқ футболга ўтишар. Лекин очиқ футболда кўпроқ “Хоразм” жабр кўриши мумкин.

19:00. “Қизилқум” – “Қўқон-1912”

Энг кўп дуранг ўйнаётган “Қўқон-1912” Навоийда “Қизилқум”га қарши майдонга тушади. Мезбонлар кетма-кет 4 та мағлубиятдан кейин ниҳоят ўтган турда Термиздан уч очко билан қайтишди. Сал қолса бош мураббий истеъфога чиқиб кетиши мумкин эди. Энди қолган ўйинларда “Қизилқум” натижаларини яхшилаб бориши керак бўлади. Қўқонликлар охиригача курашувчан, меҳнаткаш жамоа сифатида таассурот қолдираётганини ҳисобга олсак мезбонларни оғир ўйин кутяпти.

20:15. “Бунёдкор” – “Андижон”

Турни “Қалдирғочлар” ва “Бургутлар” тўқнашуви якунлаб беради. Бу учрашувга ҳам қизиқиш катта. Ўтган турда “Бунёдкор”нинг Жиззахда 2:0 ни 2:3 га айлантирган ҳолда камбек қилиб уч очкони қўлга киритгани эътиборга молик бўлди. Лекин “Бунёдкор”га қараганда “Андижон”га ғалаба зарурроқ. Бир сўз билан айтганда, ўйиннинг ҳарорати баланд бўлади.