"Ҳамма нарса бир кун келиб тугайди" - Легионеримиз клубини тарк этди. У Ўзбекистонга қайтмоқчи!

Тожикистоннинг “Хўжанд” клуби сафида тўп сурган ҳамюртимиз Самандар Очилов жамоасини ўзгартиришга қарор қилди.

Футболчи “Хўжанд”даги икки йиллик фаолиятидан сўнг у ерни тарк этди. Sports.uz мухбири билан суҳбатда ҳимоячи Самандар Очилов “Хўжанд”даги фаолияти ва кейинги режалари хусусида гапирди.

“Хўжанд”даги икки йиллик фаолиятимдан афсусланмайман”

- «Хўжанд”да икки йил ўйнадим. У ерда шароитлар анча яхши эди. Профессионал клуб сифатида шунга интилиб келяпти. Кўп йиллардан бери ОФК Кубогида қатнашиб келишади. Чемпионатда ҳам ўзим учун анча тажриба олдим, деб ҳисоблайман. Чунки Тожикистон футболида кўпроқ жисмоний кучга таянилади. Якка курашлар ҳам шунга яраша кўпроқ бўлади. Клубда яхши ўйинчилар билан бирга тўп сурдим. Россиялик, эстониялик каби легионерлар билан тажриба алмашдик. Икки йил мобайнида ОФК Кубогида қатнашдим. Ўтган йили “Насаф”нинг гуруҳига тушиб қолдик ва унда 2-ўринни олгандик. Бу йил Қирғизистонда гуруҳ баҳслари ўтказилди. Кейинги босқичга чиқишга муваффақ бўлдик. Биласиз, “Сўғдиёна”га ютқазиб қўйдик. ОФК Кубогида ҳам ўзим учун катта тажриба олдим, деб ўйлайман. Барибир бундай мусобақаларнинг “об-ҳавоси” бошқача. Ўзингизга бўлган ишонч янада ортади. Еб-ичиш, юриш-туриш, машғулотлар, умуман барчаси профессионал даражада. “Хўжанд” клубида ўтказган икки йиллик фаолиятимдан асло афсусланмайман. Менимча, ўзимизда ҳам ОФК Кубогида тўп суриш кўплаб ўйинчиларнинг истаги бўлса керак. Тожикистон ҳам худди ўзимиздагидек меҳмондўст халқ. Биринчи борганимда қанақа бўларкин, деб ўйлаганман. Аммо мураббийлар ва жамоадошларим менга ҳар томонлама ёрдам қўлини чўзишди. Шу сабабли мослашишим ҳам қийин кечмаган.

“Ўртамизда ҳеч қанақа келишмовчилик бўлмади”

- “Хўжанд”ни тарк этишимга келсак, менинг жамоа билан тузган шартномам тугади. Ўтган йили ҳам Ўзбекистондан таклифлар бўлганида қайтиш ниятим бор эди. Уйдан узоқда юриш осон эмас. Албатта, Суперлигамизда тўп суриш ниятида эдим. “Хўжанд” билан ўртамизда ҳеч қанақа муаммо бўлгани йўқ. Фақат шартномам якунига етгани сабабли кетдим. Худо хоҳласа, энди ўзимизни чемпионатда ўйнамоқчиман. У ердан қайтаётганимизда “Хўжанд” раҳбари яна келасизлар, ҳамкорлик қиламиз, деган таклифни айтди. Бироқ ҳамма нарса бир кун келиб тугайди. “Хўжанд”даги фаолиятимни тугатдим, десам ҳам бўлади.

“Сўғдиёна”ни ОФК Кубогини ютади, деб ўйлагандик”

- “Сўғдиёна” клубини нафақат Тожикистонда, балки ОФК Кубогида қатнашадиган барча жамоалар билади. Кучли жамоа. Ўтган йили “Насаф” ҳам ОФК Кубогида охиригача борганди. Ўшанда омад етишмаганди. Биз билан ўйиндан кейин мен ҳам, бутун жамоадошларим ҳам “Сўғдиёна”ни финалгача бориб, ОФК Кубогини ютади, деб ўйлагандик. Афсуски, ярим финалда омад етишмади.

“Ўйинга бошқача руҳда чиқардик”

- Тожикистондаги фаолиятимда менга кўпроқ ёққани бу мухлисларнинг қўллаб-қувватлаши бўлди. Доим ўйиндан аввал бошқача руҳда чиқардик. Бошқа клубларга қараганда, “Хўжанд” жамоасининг ўйинларга профессионал даражада тайёрлангани менга ёқди.

“Ўзбекистон чемпионатида қолмоқчиман”

- Кейинги режаларим, боя айтганимдек, Ўзбекистон чемпионатида қолмоқчиман. Ҳали аниқ таклиф бўлмади. Декабрь ойида ҳамма клуб ўз футболчиларини йиғгани учун жиддий чорловлар йўқ. Тўғри, гап-сўзлар бор. “Андижон” жамоасининг йиғинида қатнашдим ва яхши бўлди. Жисмоний тарафлама ўзим учун яхши кўникма олдим. Жисмоний томондан анча тайёр бўлиб қолишимда катта ёрдам бўлди. Биламан, “Андижон”нинг мухлислари кўп ва ишқибозларнинг севимли клуби ҳисобланади. Агар насиб бўлса, қолиш ниятим бор. Январь ойидаги таклифларга қараб яна хулоса қиламан.

Шуҳратбек Жўраев.