Ҳаммаси ҳал бўлди, "Қизилқум" янги бош мураббий билан шартнома тузди

Яқинда Sports.uz сайтида “Қизилқум” клубидаги ўзгаришлар хусусида, жумладан, сербиялик мураббий Никола Лазаревичнинг Навоийга келгани борасида хабар бергандик. Ўтган вақт давомида мутахассис клуб билан яқиндан танишди, раҳбарият билан барча масалани бафуржа гаплашиб олди.

Бугун Никола Лазаревич "Қизилқум" билан шартнома имзолаганини Sports.uz мухбирига маълум қилди. Шундай қилиб, у жорий мавсумда Ҳамиджон Актамовнинг ўрнида “Қизилқум” бош мураббийи сифатида фаолият олиб боради. Биздаги маълумотларга қараганда, Актамов клубда директор лавозимида ишлайди.

Янги бош мураббий эртадан жамоаси билан машғулотларни бошлайди. Режа бўйича “Қизилқум” клуби 3 февраль куни йиғин ўтказиш мақсадида Туркияга жўнаб кетади.

Эслатиб ўтамиз, 44 ёшли Лазаревич ўтган йили Саудия Арабистонининг "Ал-Таавун" клубида фаолият олиб борган.