"Ҳиндистондан юборилган таклиф ҳар томонлама маъқул бўлди" - "Шўртан" футболчиси яна легионерга айланди

“Шўртан”нинг 26 ёшли тажрибали футболчиси, етакчиси ва жамоа сардори Сирожиддин Қўзиев фаолиятини Ҳиндистон Суперлигасида давом эттиради. 28 ёшли ҳимоячи “Бенгалуру” билан шартнома имзолади.

Қўзиев ғузорликлар сафига мавсум бошида қўшилган ва биринчи даврада “Шўртан” сафида 15 та ўйиндан майдонга тушиб, 3 та гол муаллифига айланди. Айтиш керакки, Сирожиддиннинг бу илк бор хорижда тўп суриши эмас. Боиси, 2023 йили Малайзия чемпионатида ҳам фаолият олиб борган.

Куни кеча Sports.uz журналисти ушбу ўйинчи билан суҳбатлашди.

- Сирожиддин Ҳиндистон чемпионатига йўл олишингиз кутилмаганда юз бердими?

- Биринчи давранинг ўрталарида Ҳиндистон клуби таклиф жўнатганди. Ҳар томонлама кўриб чиқиб, маъқул вариант бўлгани учун ушбу таклифни танладик.

- “Шўртан”да асосий фигуралардан бири эдингиз. Аммо жамоа қийин вазиятда эди ва ўйлашимча, клубга ёрдамингиз зарур эди. “Шўртан” кетишингизга қандай кўнди?

- Ҳа, “Шўртан”даги вазият унчалик даражада яхши эмасди. Лекин мавсум бошида “Шўртан” билан шартнома имзолаётганимизда келишиб олгандик: агар четдан яхшироқ таклиф бўладиган бўлса, қўйиб юборишга рози бўлишган. Шу сабабли улар шартномада кўрсатилган бандларга амал қилди.

- Иккинчи даврада собиқ жамоангизни имкониятини қандай баҳолайсиз?

- Иккинчи даврада “Шўртан” янада кучаяди. Улар яхшироқ ўйинчиларни олишга ҳаракат қилишяпти. Насиб бўлса, олдига қўйилган Суперлигада қолиш вазифасини уддалайди.

- “Бенгалуру” сафига қачон қўшиласиз ва қайси рақамни танладингиз?

- “Бенгалуру” сафига яқин орада қўшиламан. Виза масаласини ҳал қилдик. Клубнинг йиғигни бошланишидан аввал менга чипта жўнатишади ва жамоа ихтиёрига етиб бораман.

- “Шўртан”нинг биринчи даврадаги натижалари қониқарсиз эди ва бу ҳам кетишингизга туртки бердими?

- “Шўртан”дан биринчи даврадаги қониқарсиз натижалар кетишимга сабаб бўлгани йўқ. Жамоа билан хайрлашишимга асосий туртки бўлган нарса, Ҳиндистондан юборилган таклиф менга ҳар тарафлама маъқул бўлди. Шу боис кетишга қарор қилдим.