"Милан" ҳужумчиси бошқа клуб билан келишувга эришди

«Милан» ҳужумчиси Сантьяго Хименес яқин вақтларда «Порту» сафига ўтиши мумкин. Инсайдер Маттео Моретто хабарига кўра, мексикалик футболчи португалиялик «аждарлар» таклифини қабул қилган.

Ҳозирча икки клуб ўртасидаги музокаралар якуний босқичга кирган. Томонлар шартнома бўйича барча расмий масалаларни келишиб олиш арафасида. Яқин кунларда «Порту» «Милан»га расман таклиф йўл қилиши, у эса футболчини кейинчалик сотиб олиш ҳуқуқи билан ижарага олишни назарда тутади.

Сантьяго Хименес «Милан» таркибига 2025 йил бошида қўшилган. Унгача у Нидерландиянинг «Фейеноорд» жамоасида тўп сурган ва италияликлар уни 30,2 миллион евро эвазига сотиб олган эди.

Transfermarkt портали маълумотларига кўра, 25 ёшли ҳужумчининг жорий бозор қиймати 18 миллион евро атрофида баҳоланмоқда. Хименеснинг «Милан» билан амалдаги шартномаси 2029 йилгача мўлжалланган.