Ҳусанов изидан... Гвардиола Франциядан яна бир суперфутболчи топди
2025 йилнинг 20 январь куни “Манчестер Сити” Франция чемпионатида иштирок этаётган “Ланс” клубидан ўзбекистонлик ҳимоячи Абдуқодир Ҳусановни 40 миллион евро эвазига трансфер қилган эди.
Аввалига кўпчилик бу трансферга катта шубҳа билан қаради ва ёш легионернинг Англия Премьер-лигасидек мураккаб чемпионатда ўйнаб кетиши қийинлигини таъкидлади.
Бироқ, Ҳусанов қисқа муддатда нималарга қодирлигини кўрсата бошлади. Айниқса, янги мавсумда Хосеп Гвардиолага икки йилдан бери қаттиқ бош оғриғи бўлаётган ўнг қанот ҳимоясидаги муаммога зўр ечим бўла олишини кўрсатди.
Испаниялик мутахассиснинг ўзи Абдуқодир Ҳусановнинг “Манчестер Сити”га келишини йилнинг энг ёрқин трансфери, деб атади ва ўзбек футболчиси узоқ муддат “Этихад” аренасида фаолият юритишидан умидвор эканини алоҳида таъкидлади.
Ёзги трансферлар ойнасининг сўнгги кунида “шаҳарликлар” Франция чемпионатидан яна бир катта трансферни амалга оширди. Бу гал Гвардиола жамоасига ПСЖ таркибида Лига 1 чемпиони ва Европа Чемпионлар лигаси ғолиби бўлган машҳур дарвозабон Жанлуижи Доннарумма қўшилди.
Иқтидорларга бой бўлган Франция чемпионатини синчковлик билан кузатиб бораётган “Манчестер Сити” скаутлари Хосеп Гвардиола талабига жавоб бера оладиган яна бир ёш ўйинчини нишонга олди.
20 ёшли Жоау Невеш ПСЖда ҳақиқий сенсация бўлди. Португалиялик футболчи қисқа фурсатда ўз позициясида дунёнинг энг зўр ўйинчиларидан бири эканини намойиш қила олди. Франция футболи экспертларининг таъкидлашича, Невеш ўзининг маҳорати ва ўйини билан бугунги кунда жамоани бирлаштириб турган фигурага айланган.
Хусусан, Жоау майдонни жуда яхши кўра олиш, ўйинни ўқиш, аниқ паслар, майдонда мувозанатни ушлаб туриш, ўйинни бошқариш қобилияти билан мухлису мутахассисларни ҳайратга соляпти.
Жоау Невеш “шаҳарликлар” бош мураббийи Хосеп Гвардиола эътиборига ўтган мавсумда Чемпионлар лигаси доирасидаги учрашувда тушган. Ўшанда португалиялик вундеркинд манчестерликлар дарвозасини ишғол қилиб, ПСЖнинг 4:2 ҳисобидаги ғалабасига ҳисса қўшган эди.
Испаниялик мураббий ёш ўйинчи “Манчестер Сити”нинг майдон марказидаги устунлигини таъминлай олади, деган хулосага келди ва клуб директорлари кенгашига бу трансферни амалга ошириш таклифини берди.
“Манчестер Сити” мутасаддилари бу мураккаб трансфер бўлишини яхши англаган ҳолда дастлабки таклифни 120 миллион евро билан бошлашга тайёргарлик кўряпти. Улар Жоау Невеш учун бошқа клублар курашга қўшилишдан аввал масалани катта сумма билан бир уринишда ҳал қилмоқчи.
Таъкидлаш лозимки, “Манчестер Сити” Ҳусановнинг трансферини амалга оширишда ҳам шу усулдан фойдаланган. Яъни, Абдуқодирга топ-лигаларнинг ўндан зиёд клуби кўз тикиб турган вазиятда, “Ланс” ўзбек ҳимоячиси трансферидан 25 миллион евро ишлаб олишни орзу қилиб турган паллада “шаҳарликлар” бирданига 40 миллион евро тўлаб, Ҳусановни Англияга олиб келганди...
Фикрлар