Ҳусановни Чемпионлар лигасида катта тарихий воқеа кутмоқда

УЕФА томонидан ўтказилаётган энг нуфузли халқаро турнир – Чемпионлар лигасининг умумий босқичида иштирок этадиган барча жамоалар номи маълум бўлди.

Бугуни кунда “кўҳна қитъа”нинг энг кучли 36 та жамоаси кейинги босқич йўлидаги рақибларини билиб олди. Қоидага кўра, ҳар бир жамоа қуръа рўбарў қилган саккизтадан жамоа билан ўзаро куч синашади. Ҳар бир жамоа шу ўйинлардан тўрттасини ўз майдонида ва қолган тўрттасини сафарда ўтказиши белгилаб қўйилган.

Европа Чемпионлар лигасининг бу йилги мавсумида ўзбек футболчиларидан фақатгина Абдуқодир Ҳусанов иштирок этиши кутилмоқда.

“Манчестер Сити” Англия Премьер-лигасининг ўтган мавсумини учинчи ўринда якунлаб, энг нуфузли халқаро турнир йўлланмасини нақд қилган эди.

Қуръа натижасига кўра, Хосеп Гвардиола шогирдлари янги мавсумда  Испаниянинг “Реал Мадрид” ва “Вильярреал”, Германиянинг “Боруссия Дортмунд” ва “Байер Леверкузен”, Италиянинг “Наполи”, Норвегиянинг “Будё-Глимт”, Туркиянинг “Галатасарой” ҳамда Франциянинг “Монако” клублари вакиллари билан куч синашади.

Статистика билан шуғулланадиган Opta маркази экспертлари “Манчестер Сити” ва “Будё-Глимт” учрашувига алоҳида эътибор қаратди. Манбага кўра, Абдуқодир Ҳусанов жамоаси мусобақа тарихида илк бор Норвегия клуби билан тўқнаш келади.

Қолаверса, “шаҳарликлар”нинг норвегиялик тўпурари Эрлинг Холанд узоқ йиллик танаффусдан кейин “Будё-Глимт”га қарши ўйнайди. 25 ёшли форвард 2018 йили “Мольде” таркибида ўйнаб юрган кезлари “Будё-Глимт” жамоаси дарвозасини ишғол қилган.

Абдуқодир Ҳусановга тўхталадиган бўлсак, 21 ёшли марказий ҳимоячи Европа Чемпионлар лигасида ўйнаш тажрибасига эга. У Франциянинг “Ланс” таркибида ҳам, “Манчестер Сити” таркибида ҳам қитъанинг энг йирик турнирида тўп тепган.

Айниқса, ўтган мавсум ўзбек легионерининг “Сантьяго Бернабеу”да “Реал”га қарши кўрсатган ўйини мутахассислар томонидан юқори баҳоланган.

Бундан ташқари, Ҳусанов Франция чемпионати доирасида “Ланс” футболчиси сифатида “Монако” билан бўлган баҳсда майдонга тушганини ҳам инобатга олиш мумкин.

“Будё-Глимт”дан ташқари, “Вильярреал”, “Байер”, “Боруссия Дортмунд”, “Наполи” ва “Галатасарой” билан бўладиган учрашувлар ҳамюртимиз учун янгилик ҳисобланади.

Эслатиб ўтамиз, Абдуқодир Ҳусанов “Бунёдкор” академиясида таҳсил олган. Лекин профессионал фаолиятини Беларуснинг “Энергетик-БГУ” клубида бошлади.

Ҳусанов 2023 йилнинг ёзида Франциянинг ўша пайтдаги вице-чемпиони “Ланс” сафига кўчиб ўтди. 2025 йилнинг 20 январида эса, “Манчестер Сити” легионеримизни 40 миллион евро тўлаб, Англияга олиб кетди.

Абдуқодир Ҳусанов “Ланс” тарихида клубга энг катта молиявий фойда келтирган футболчи сифатида қадрланади.

“CAFA Nations Cup 2025”: Ҳусановнинг бир ўзи Эрон терма жамоасидан қиммат туради!

Ҳусановнинг рекорди жойида қолди!

Файзуллаев узоқ танаффус олишга мажбур бўлди

Ҳусанов бор, бу юлдуз керак эмас!

Гвардиола Ҳусанов бўйича қарорини айтди

Гвардиола, Ҳусановдан воз кечиб, катта хато қилдинг!