Ҳусановнинг рекорди жойида қолди!
Франция клублари “топ-5”нинг қолган лигалари ва бадавлат мамлакатлар чемпионатларига истеъдодли ўйинчиларни етказиб бериши билан ҳам ном чиқарган. Аксарият клублар ўз бюджетини кўзга кўринган ўйинчиларни сотиш орқали тўлдириб боради.
Хусусан, Ўзбекистон миллий терма жамоаси марказий ҳимоячиси Абдуқодир Ҳусанов ўйнаган “Ланс” клуби ҳам сўнгги йилларда ўйинчилар трансферидан даромад қилиб келмоқда.
“Ланс” клубининг бу ёздаги энг қимматбаҳо трансфери Энди Диуф бўлди. Францияликлар 22 ёшли марказий ярим ҳимоячини Италиянинг “Интер” жамоасига 20 миллион еврога трансфер қилди. А Серия вакили яна беш миллион еврони бонус сифатида қўшиб тўлайди.
Таъкидлаш жоизки, “Ланс” бунгача иккита рекорд трансферни амалга оширишни уддалаган эди. Дастлаб, “Ланс” мутасаддилари 2023 йилнинг 14 июнида Лои Опендани Германиянинг “Лейпциг” клубига 40 миллион еврога трансфер қилганди.
Клуб тажрибали тўпурарни бир йил олдин Бельгиянинг “Брюгге” клубидан 15,39 миллион еврога харид қилганди. Бу трансфер “Ланс” тарихидаги энг қиммати бўлди.
Орадан бир ярим йил ўтиб, “Ланс” яна 40 миллион евролик чиқиш трансферини расмийлаштирди. 2025 йилнинг 20 январида “Манчестер Сити” ўзбекистонлик легионер Абдуқодир Ҳусанов учун лансликларга шу суммани биттада ўтказиб берди.
Абдуқодир Ҳусанов “Ланс”га энг катта даромад келтирган ўйинчи ҳисобланади. Клуб раҳбарияти футболчимизни “Энергетик-БГУ”дан трансфер қилиш учун юз минг евро сарфлаган. Бир ярим йилда бу харажат тўрт юз баравар фойдаси билан қайтди.
Шу тариқа, Лои Опенда ва Абдуқодир Ҳусанов “Ланс” тарихида энг қимматга трансфер қилинган футболчилар мавқеини сақлаб қолди.
Нуфузли манба – transfermarkt.world порталида ҳам “Ланс” клубининг энг қимматбаҳо чиқиш трансферлари рўйхати келтирилган ва ундан Опенда ва Ҳусанов бир хил кўрсаткич билан пешқадам сифатида қайд этилган.
Улардан кейинги ўнталикдан ўрин олганлар қуйидагича кўриниш ҳосил қилди:
Элье Вахи – “Марсель”, 27 миллион евро.
Секо Фофана – “Ан-Наср”, 25 миллион евро.
Кевин Дансо – “Тоттенхэм”, 25 миллион евро.
Нил Эл-Айнауи – “Рома”, 23,5 миллион евро.
Шейк Дукур – “Кристал Пэлас”, 22,6 миллион евро.
Энди Диуф – “Интер”, 20 миллион евро.
Лоик Баде – “Ренн”, 17 миллион евро.
Эл-Ҳажи Диуф – “Ливерпуль”, 15 миллион евро.
Фикрлар