Ҳусановни ўйнатмаётган Гвардиола ғалабадан кейин нималар деди?

“Манчестер Сити” бош мураббийи Хосеп Гвардиола ўзбекистонлик легионер Абдуқодир Ҳусановни кетма-кет учинчи маротаба майдонга туширмади.

Легионеримизни асосий таркибдан сиқиб чиқарган Нико  О’Рейли “Кристал Пэлас”га қарши ўтказилган учрашувда гол уриб, яна ўзини кўрсатди.

Дастлаб ўз дарвозасидан иккита тўп ўтказиб юборган “шаҳарликлар” кейинчалик рақибга бешта гол уриб, муҳим ғалабани қўлга киритди.

Учрашувдан кейин Хосеп Гвардиола ўйин борасида ўз фикрларини билдириб ўтди.

- Биз жуда яхши ўйин ўтказганимизни таъкидлашни истайман. Ҳисобда икки тўп фарқи билан ортда борган бўлсак-да, жуда кўп вазиятлар яратдик. Мен танаффусда яхши ўйнаётганимизни футболчиларга айтдим.

Учрашувдаги бурилишни Кевин де Брюйненинг жарима зарбасидан йўллаган аниқ зарбаси ясаб берди. Шундан кейин ишларимиз юришиб кетди. Бу биз узоқ йиллар кўриб кўниккан Кевин эди. Мен плеймейкер охирги бир ярим йилда турли муаммолар билан курашганини биламан. Кевиннинг бирор жойи оғримаса, умуман бошқа даражада ўйнайди.

Эртага тур учрашувлари якунланганидан кейин мусобақа жадвалига бир назар солиб, позицияларимиз қандай эканини билиб оламиз.

Ҳали олдинда яна олтита баҳс бор, уларнинг бари ўта муҳим ва мураккабдир, - деди Хосеп Гвардиола.