Ибрагимович: Месси футболчилар билан эмас, ҳайкаллар билан ўйнамоқда

Хабарингиз бор, Клублар ўртасидаги Жаҳон чемпионатининг 1/8 финал босқичидан ўрин олган ПСЖ ҳамда "Интер Майами" жамоалари ўртасидаги баҳсда парижликлар йирик 4:0 ҳисобида ғалаба қозониб, АҚШ клубини турнирдан чиқариб юборди. Беллашувдан сўнг Месси билан маълум бир вақт бирга тўп сурган Златан Ибрагимович аргентиналик юлдузнинг жамоадошларини танқид қилди.

"Лионель Месси ютқазгани йўқ, "Интер Майами" ютқазди! Месси футболчилар билан эмас, ҳайкаллар билан ўйнамоқда. Атрофидаги футболчилар худди орқасида цемент тўла халта кўтаргандек югуришади. Агар у ҳақиқий ва кучли жамоалардан бирида ўйнаганида, биз асл Мессини кўрган бўлардик. Лео футболни яхши кўргани учунгина ҳали ҳам ўйнаяпти. У ҳозир ҳам футболчиларнинг 99 фоизи уддалай олмайдиган ишларни қила олади. "Интер Майами"да на мураббий бор, на юлдузлар, ҳатто тўпсиз ҳаракатланишни биладиган футболчилар ҳам йўқ. Агар сиз уни ҳақиқий бир жамоага қўйсангиз, у барчасини ер билан яксон қилади", - деди собиқ футболчи.