Икки нафар пара дзюдочимиз бронза медаллари учун курашни давом эттиради

Пара дзюдо бўйича эркаклар ўртасида -100 кг вазн тоифасида ҳамюртимиз Шариф Ҳалилов чорак финалда Буюк Британия вакили Кристофер Скеллига қарши татамига чиқди.

Афсуски, ушбу курашда ҳамюртимиз иппон баҳоси эвазига 10:0 ҳисобида мағлуб бўлди. Бироқ Ҳалилов бронза медали учун курашни давом эттиради. У ўтиш баҳсида япониялик Ёшиказу Матсумотога қарши татамига чиқади.

Эркаклар ўртасида -90 кг вазн тоифасида чорак финалда иштирок этган ҳамюртимиз Шуҳрат Бобоевга ҳам британиялик пара дзюдочи рақиблик қилди.

“Олтин очколар”га қадар давом этган курашда Бобоев пассивлиги учун 3 марта огоҳлантирилди ва натижада британиялик Эллиот Стюарт ғолиб деб топилди.

Энди Бобоев ҳам бронза медали учун курашни давом эттиради. Унга бу йўлда қозоғистонлик Жанбота Аманжол рақиблик қилади.