Икки ёш тоифасидаги гандболчи қизларимиз “Trophy” кубогининг Осиё босқичига йўл олишди

Мўғилистон пойтахтида гандбол бўйича ўсмир ва ёш қизлар ўртасида Халқаро гандбол федерацияси тақвим режасидан ўрин олган “Trophy” мусобақасининг Марказий Осиё босқичи ўз якунига етмоқда. Бугун ёшлар тоифасидаги беллашувларда ғолиб жамоа номи аниқланди.

Ушбу баҳс барча ўйинларда ғалаба қозониб келаётган Ўзбекистон ва Туркманистон U-19 жамоалари ўртасида кечди. Ҳамюртларимиз бутун ўйин давомида ўз устунликларини ўйин ва учрашув якунида таблода ҳам акс эттира олишди. Мазкур беллашув юртдошларимизнинг 43:20 ҳисобидаги ғалабаси билан якунланди ва улар ҳам мусобақанинг Осиё минтақаси босқичига йўл олишди.

Эслатиб ўтамиз, кеча ўсмирларимиз муддатидан аввал гуруҳдаги ғолибликни қўлга киритиб, “Trophy” кубогининг Осиё босқичига йўл олишган эди. Эртага улар мусобақадаги сўнгги учрашувини қирғизистонлик тенгқурларига қарши ўтказиб қўйишади. Бу ҳақида МОҚ хабар бермоқда.