Илдар Маматказин: Хориждан тушган яхши таклифларни рад этдим
Ads

«Андижон» жамоаси «Coca-Cola» Суперлигасининг илк турида Навоийда «Қизилқум» билан баҳс олиб борди ва ушбу учрашувда кучлар тенг келди. Таркиби анча янгиланган андижонликлар эса мухлисларда яхши таассурот қолдиришди. Айниқса, жамоа сардори сифатида майдонга тушган Илдар Маматказин катта ҳажмдаги ишни бажарди. Кўриниб турибдики, у бутун мавсум давомида «Андижон»нинг етакчиларидан бири сифатида ўзини кўрсатишга бўлган иштиёқи катта. Шуни айтиш керакки, футболчи охирги пайтларда жароҳатини даволатиб юрди ва эндиликда у тўлиқ соғайди. Дарвоқе, Маматказин янги мавсумни Малайзия чемпионатида бошлаши ҳам мумкин эди. Бироқ ўзи учун ўта қулай бўлган таклифдан кўра «Андижон» учун ёрдам беришни маъқул кўрди. 1-турдан ўрин олган «Қизилқум»га қарши учрашувдан сўнг андижонликларнинг сардори билан суҳбатлашдик.

- «Қизилқум» жамоасига қарши учрашувда «Андижон»нинг қайд этган дуранг натижасини ғалабага тенглаштирса бўладими?

- Дуранг ёмон натижа эмас деб ўйлайман. Бу биз учун биринчи ўйин эди. Қолаверса, янги таркиб билан мавсумга киришгандик. Ушбу сабабларни ҳисобга оладиган бўлсак, чиндан ҳам меҳмонда қайд этилган дуранг натижани ўзимиз учун қониқарли дея ҳисоблашимиз мумкин. Аммо биз майдонга дурангни ўйлаб эмас, балки ғалаба қозониш мақсадида тушгандик. Лекин кўрган бўлсангиз, ўйин давомида яратилган имкониятлардан фойдалана олмадик. Футболда эса шундай мақол бор: сен урмасанг, сенга уришади. Шунчаки, имкониятларимиздан фойдаланганимизда Андижонга ғалаба билан қайтган бўлардик.

- Ушбу беллашувда кўрдикки, сиз «Андижон» жамоасининг сардори сифатида етакчилардек ўйин кўрсатдингиз. Сардорлик боғичи остида ўйнашнинг масъулияти қандай экан?

- Ўйиндан олдин сардорлик боғичини менга топширишди. Мен учун эса бу ҳолат албатта жонажон жамоамнинг сардори бўлиш катта шараф. Шунинг учун буни жуда катта масъулият деб ҳисоблайман. Натижада икки баробар куч билан ўйнашингизга ундайди.

- Илдар, «Андижон» жамоасига қишки йиғин бошланганида биринчилардан бўлиб қўшилгандингиз. Аммо охиргилардан бўлиб шартнома имзоладингиз. Нима учун шартнома имзолаш масаласи бунчалик чўзилиб кетди?

- Йиғин бошланган пайтда клуб раҳбарлари билан қўл бериб келишувга эришгандик. Шунинг учун раҳбарлар хотиржам бўлиб, янги таклиф этилган бошқа ўйинчилар билан музокаралар олиб боришди. Чунки «Андижон»ни кучайтириш керак эди. Шунинг учун бўлса керак, мавсум бошланишига яқин клуб билан шартнома имзоладим. Қишки йиғин вақтида эса менга хориждан молиявий томондан яхшигина шартномани таклиф ҳам қилишганди. Лекин уларга рад жавобини беришга қарор қилдим. Чунки туғилиб ўсган шаҳримга, менга футболчи бўлишимга катта ёрдам берган қадрдон жамоамга ёрдам беришга қарор қилдим.

- Ҳа, сизга Малайзиядан молиявий томондан ҳар томонлама қулай таклиф билдирилганини биламан. Футболчининг ҳаёти қисқа бўлади ва бу вақт оралиғида ўзининг молиявий имкониятларини яхшилаб олиш ҳаракатида бўлади. Кейинчалик бу имкониятни қўлдан чиқариб юборганингиз учун афсусланиб қолмайсизми? Уларнинг таклифини рад этиш учун сизда жиддий асослар етарли эдими?

- Тўғри айтдингиз, футболчининг ҳаёти қисқа бўлади. Лекин «Андижон» клубининг раҳбарларига эркакча қўл бериб қўйгандим. Шу боис у ердан кетиб қолганимда гапимнинг устидан чиқмасдан яхши иш қилмаган бўлардим. Энди эса афсус қилишга ҳожат йўқ. Поезд кетиб бўлган. Мақсадимиз эса ўз ўйинларимиз билан Андижон халқини хурсанд қилиш ва уларнинг дуосини олиш.

- Шунингдек, «Андижон» клубида тўп суришингизда тоғангиз Ориф Маматказиннинг ҳам катта ҳиссаси бўлганлиги ҳақида эшитдик…

- «Андижон» жамоаси тоғам учун бегона эмас. Албатта, бу ерда қолишимда тоғамнинг ҳам ҳиссаси бор. Нимадир қилмоқчи бўлсам, у билан маслаҳатлашаман. Менга ҳар доим бир гапни айтиб келади: сен андижонликсан, жамоа учун бор кучинг билан ўйнашинг керак деб таъкидлаб келади. Шунингдек, ҳаётда ростгўй ва ҳаққоний бўлишим кераклигини ҳам уқтириб келади.

- Ниҳоят, янги мавсум ҳам бошланди, таркибда ҳам жиддий ўзгаришлар бўлди. Айтинг-чи, «Андижон»нинг имкониятларини қандай баҳолайсиз? Суперлигага илк бор чиққан клуб сифатида аввалига ўз ўрнини сақлаб қолиши катта гапми ёки қайсидир ўринга даъвогарлик қила оладими?

- Бу йил 80 фоизга жамоамиз таркиби ўзгарди. Ҳозирдан эса бир нарса дейиш қийин. Чунки таркибимиз янги. Шундай экан, бир-биримизни тушуниб олишимиз учун бизга вақт керак. Лекин таркибимиз чакки эмас. Жамоага асосан меҳнаткаш футболчилар йиғилган. Албатта, сафимизда тажрибали ўйинчилар ҳам бор. Бобур Акбаров, Ойбек Қиличев, Рўзим Аҳмедов, мана шу кунларда Дилшод Раҳматуллаев ҳам қўшилди. Ушбу футболчилар жамоани ўз ортларидан эргаштира олишади.