Илҳом Алижонов: "Орқага йўл йўқ, ғалабага бўлган иштиёқимиз кучли"

“Андижон” жамоаси Суперлиганинг 4-турида Тошкенда “Олимпик” клубига қарши бўлиб ўтадиган учрашувга жиддий тайёргарлик кўряпти. Бор эътибор мазкур ўйинга қаратилган.

Жамоанинг иқтидорли ўйинчиларидан бири Илҳом Алижонов клуб матбуот хизматига бўлажак учрашув олдидан фикрларини билдирди.

- Жамоанинг кайфияти қандай ва “Олимпик” клубига қарши олиб борилаётган тайёргарлик борасида тўхталиб ўтсангиз.

- Чемпионат доирасида “Бунёдкор”га қарши учрашувдан кейин ФИФА кунлари бўлди ва бироз танаффус юзага келди. Шу сабабли биз Дукентда тўпландик ва ўша ерда тайёргарлик олиб бордик. Жамоамиз ўйинга жуда яхши ҳозирлик кўрди ва кайфият ҳам юқори даражада. “Олимпик” билан беллашувга тайёрмиз, деб айта оламан.

- Умуман, бўлажак рақиб хусусида нималарни айтган бўлардингиз?

- Яқинда ташкил топган жамоа ва ўзаги асосан иқтидорли ёшлардан иборат. Тажриба борасида бир нима дейишим қийину, лекин улар икки йил давомида яхши шаклланди, деб ўйлайман. Бош мураббийи ҳам жамоа билан яхши иш олиб бормоқда. Мазкур учрашувдан нима кутяпман? Табиийки, жамоамизнинг ғалабасини. Худо хоҳласа, ғалаба қозониб ишқибозларимизни қувонтирамиз. Майдонга сўзсиз уч очко учун тушамиз.

- Охирги иккита ўйиндаги мағлубиятдан қандай хулосалар чиқарилди?

- Иккита мағлубиятдан кейин ҳамма яхши тушуниб турибди, орқага йўл йўқ. Мақсадимиз фақат ғалаба. Иккита мағлубиятга келсак, бу – футбол. Жамоамизни бу ҳолатдан ўзимиз олиб чиқиб кетамиз. Ташқаридан ҳеч ким бизга ёрдам бермайди. Бутун жамоа сифатида курашиб, бу ҳолатдан чиқиб кетамиз, албатта.

- “Олимпик”ни қандай ютиш мумкин, деб ўйлайсиз?

- Биринчи навбатда иштиёқ эвазига. Майдонга тушганда ҳар бир футболчининг кўзи ёниб туриши керак. Айнан шу нарса бизнинг жамоамизда бор. Ғалабага бўлган иштиёқимиз жуда кучли. Юқорида таъкидлаганимдек, мухлисларимизни хурсанд қиламиз.

- Нима учун 66-рақамни танлагансиз?

- Биринчи навбатда 66-рақамни менга “Навбаҳор”да ўйнаган пайтимда беришган. Ўша пайтда администраторимиз ҳазиллашиб, бармоқларинг олтиталиги учун сенга иккита 6 рақамини бердик деганди. Шундан кейин 66-рақамда ўйнашни бошлаганман. Ўзимга ҳам бу рақам ёқиб қолган.

“Андижон” матбуот хизмати.