Индонезия чемпионатида ҳам мавҳумлик. Жавлон Гусейновнинг маоши эса камайтириладими...ми?

Айни пайтда коронавирус пандемияси туфайли аксарият мамлакатларда карантин жорий этилганидан хабардорсиз. Натижада хорижда тўп сураётган ўзбекистонлик футболчилар ҳам ўйин амалиётисиз қолиб кетмоқдалар. Фақат Тожикистон ҳамда Белоруссиядаги ҳамюртларимиз у ердаги чемпионатларда тўп суришаётганини яхши билсангиз керак.

Умуман айтганда, ўзбекистонлик футболчиларни турли хил мамлакатларда учратиш мумкин. Масалан, ўтган йилдан бери Индонезия чемпионатида тўп суриб келаётган ҳамюртимиз Жавлон Гусейнов ҳам борлигини унутмаслик керак. Футболчимиз маҳаллий “Борнео” жамоаси шарафини муносаб тарзда ҳимоя қилиб келаётгани ва у ерда жамоа сардори сифатида тўп сураётгани ҳам эътиборга молик, албатта.  

Айтиш мумкинки, Гусейновнинг у ердаги мухлислари ҳам кўпайиб қолди. Бироқ Индонезияда ҳам чемпионат баҳслари тўхтатиб қўйилган. Хўш, унда маҳаллий ишқибозлар қачон яна катта футболдан баҳра олишлари мумкин? Индонезиядаги ҳамюртимиз эса у ердаги вазият ҳақида гапирар экан, ҳолатни қуйидагича тушунтирди.   

- Бизда ҳам чемпионат тўхтаган. ФИФА кунларидан олдин, 13-14 март кунлари охирги турни ўтказдик. Кейин эса 20 мартгача машғулот ўтказдик. Шундан сўнг ҳукумат машғулотлар ўтказишга ҳам рухсат бермади. Мана шундан буён барчамиз карантиндамиз. 29 майгача федерация мухлат олган. Агар вазият яхшиланмаса, менимча чемпионатни сентябрь ойигача қолдириб юборишлари мумкин.

Бу ҳам етмаганидек, ҳозирги карантинда чемпионатлар тўхтатиб қўйилиши ортидан клублар ўз футболчиларига ойлик маошларини тўлашда давом этиш масаласи ҳам жиддий муаммога айланиб бормоқда. Кузатаётган бўлсангиз, ҳаттоки, номдор клублар ҳам бу борада турли қийинчиликларга дуч келишмоқда. Албатта, хориждаги легионерларга ҳам бундай вазиятда осон тутиб бўлмайди. Қизиқ, Гусейновнинг жамоаси – “Борнео” бу борада қандай йўл тутмоқда? У футболчиларга ойлик маошларини тўлашда давом этадими ёки бунинг акси кузатиладими? Ўзбекистонлик ўйинчи эса мавжуд масалага қуйидагича ўз муносабатини билдирди.

- Март ойидаги иш ҳақимизни тўлиқ олганмиз. Апрель ҳамда май ойларидаги маошларимизни эса камайтиришмоқчи, лекин ҳозирча аниқ эмас. Менимча, бундай масалаларни футболчилар билан келишиб ҳал қилиш керак. Ҳозирча эса бу борада клуб биз футболчиларга расмий хат билан мурожаат қилгани йўқ. Ўйлашимча, ҳаммасини вақт кўрсатади.