"Андижон"нинг ёзги йиғин режаси қандай?

Хабарингиз бор, айни пайтда Суперлига клублари қатори “Андижон” жамоаси ҳам ёзги таътилда. Режага мувофиқ 10 июндан ўз қароргоҳида тайёргарлик жараёнлари бошланади.

Клуб матбуот хизматининг хабар беришича, ҳозирда клуб раҳбарияти томонидан жамоани ёзги йиғинни муносиб ва ҳар томонлама пухта ўтказиш учун режалар ишлаб чиқилмоқда. Яъни, ёзги йиғин режаси икки қисмга бўлинади. Дастлаб ўз қароргоҳидаги машғулот жараёнлари ва иккинчиси хориждаги йиғин.

Ҳозирда йиғин ўтказиш учун Беларусь ёки Грузия варианти кўриб чиқилмоқда. Ҳар қандай ҳолатда ҳам "Андижон" 23 июнь санасида хорижга йўл олади ва у ерда 4 та назорат учрашуви ўтказилиши режалаштирилган. Барчаси расман ўз тасдиғини топиши биланоқ бу ҳақида яна расмий маълумот тақдим этилади.

“Андижон”нинг навбатдаги учрашуви 18 июлга белгиланган бўлиб, шу куни 12-тур доирасида “Бобур арена”да “Сурхон”ни қабул қилади. Унгача эса "Бургутлар" кучайтирилган тарздаги ўқув-машғулот йиғинларини олиб боради.

Албатта, ёзги селекцияда таркибда қандай ўзгаришлар бўлиши ҳам ишқибозларни қизиқтириши турган гап. Бу борада ҳам айрим янгиликлар юз бериши кўзда тутилган бўлиб, раҳбарият амалий ишлар олиб бормоқда.

Маълумот учун, ёзги трансфер ойнаси 8 июлдан очилади ва 10 августга қадар давом этади.