Индонезияда рамзий терма жамоадан жой олган футболчимиз шартномасини узайтирди

Ўтган йили Индонезиянинг «Борнео» таркибига бориб қўшилган ҳамюртимиз Жавлон Гусейнов ўзидан илиқ таассурот қолдира олди. У ўтган бир йил давомида клубида ўз ўрнига эга бўлди ва натижада сардорлик боғичи остида ўйинларни ўтказди. Бир сўз билан айтганда, ҳамюртимиз ўзига билдирилган ишончни оқлади. Гусейнов ҳам ўтган йилги мавсумдан қониққанлигини қуйдагича ифодалади.

- Биласизми, Индонезиядаги дастлабки мавсумим мен учун яхши таассурот қолдирди. Шахсан ўзим учун ҳам қониқарли мавсумни ўтказа олдим деб айтишим мумкин. Чемпионатдаги 34 та ўйиндан 32 тасида майдонга тушдим. Қолаверса, иккита гол ҳам урдим. Яна иккита учрашувни сариқ карточкалар туфайли ўтказиб юбордим. Мен барча беллашувларда 90 дақиқадан ўйнадим ва мавсум якунига кўра йилнинг рамзий терма жамоасидан ҳам жой олдим. Салбий томонларига келсак, олдин ҳам айтганимдек, бу асосан ҳакамлик савияси билан боғлиқ. Қолаверса, тақвим бўйича биз охирги уч ой давомида ҳар тўрт кунда ўйин ўтказишимизга тўғри келди. Индонезия кичкина мамлакат эмас, шу боис сафар ўйинларига самолётда парвоз қилиб, сўнг яна автобусда йўл юришимизга тўғри келди. Айнан йўлда кўп юрганимиз ҳам бизни бироз қийнаб қўйди.

Жавлон Гусейновнинг кейинги тақдири бизни қизиқтирганди. Чунки ҳамюртимиз Индонезия жамоаси билан мавсум охирига қадар келишувга эришганди. Ушбу муддат тугагач, ҳимоячи қандай йўл тутганига беэътибор бўла олмасдик. Аммо маълум бўлишича, ҳаммаси футболчи ва клуб учун хайрли якун топган ҳолда иккала томон келишувни узайтиришган. Бу ҳақида футболчимиз шундай деди:

- Шартномани янгилаганимга келсак, клубимиз раҳбари томонидан ўртадаги битимни узайтириш ташаббуси ўртага ташланди. Тўғриси, ўзим ҳам клубнинг менга янги шартнома таклиф қилишини кутгандим. Чунки мавсумни омадли ўтказганим сабабли яна қолишимни ўйлагандим. Бунинг устига мухлисларда ҳам илиқ таассурот қолдира олганимни ҳис қилдим.

Гусейнов Индонезияда ўзидан яхши таассурот қолдира олгани боис унга бир қатор қизиқарли таклифлар ҳам келиб тушгани ойдинлашди. Лекин ҳамюртимиз нима учун бошқа чақирувларга жиддий қарамади? Бунинг жавобини қуйида билиб олишингиз мумкин.

- Тан оламан, менга 2-3 та яхши таклифлар ҳам бўлганди ва уларнинг чақирувларини кўриб чиқаётгандим. Аммо яхшилаб ўйлаб қарасам, мен учун жамоа ўзгартиришдан наф йўқ экан. Чунки «Борнео»да мени ҳамма нарса қониқтиряпти, шаҳарга ҳам ўрганиб қолганман. Гапнинг очиғи, жамоамиз мураббийи бошқа клубга ўтгани сабабли у билан бирга кетмоқчи бўлиб юргандим. Чунки унинг ўзи мен билан бирга ишлагин деб таклиф билан чиққанди. Лекин ўйлаб-ўйлаб ўз клубимда қолишни хоҳладим ва тўғри йўл тутдим деб ҳисоблайман, - дея фикр билдирди, Гусейнов.

Бундан ташқари, Жавлонга ўзимизнинг клубларимиздан ҳам чорловлар бўлган ёки бўлмаганлигига қизиқдик. Аммо футболчининг айтишича, Ўзбекистондан ҳеч бир жамоа унга таклиф билан чиқмаган.

- Ўзимизнинг клубларимиздан таклифлар бўлгани йўқ. Назаримда, мени яна Индонезияда қолишимни ўйлаб чақиришмаган бўлишса керак. Муҳими, ўзимни бу ерда яхши ҳис қиляпман.