Инфантино ЖЧ ҳақида: "Эрон АҚШга можаросиз кирди. Визани рад этишлар ҳақида гапирилган, аммо миллионлаб одамларга виза берилди"

ФИФА президенти Жанни Инфантино АҚШ, Канада ва Мексика ҳудудида ўтказилган 2026 йилги жаҳон чемпионати ташкилотчилик жиҳатидан муаммосиз ўтганини таъкидлади.

«Мусобақа давомида зўравонлик, жиддий можаролар ёки хавфли ҳолатлар қайд этилмади. Ҳаммаси юз фоиз хавфсиз, осойишта муҳитда ўтди. Фақат қувонч ва бахт ҳукмрон бўлди.

7 миллионга яқин мухлис 200 дан ортиқ давлатдан келиб, 16 та ажойиб шаҳар ва стадионларда ўтган ўйинлардан баҳра олди. Бирорта ҳам жиддий инцидент рўй бермади, зўравонликка йўл қўйилмади. Фақат қувонч, ҳис-туйғулар, бахт, бирдамлик ва ҳамжиҳатликни кўрдик. Ҳамма ўзини хавфсиз, хотиржам ва бахтли ҳис қилди.

Дунё бўйлаб миллиардлаб томошабинлар чемпионатни уйларидан туриб кузатишди. Улар дўстлари ва оилалари билан бирга футболга бўлган муҳаббат онларини ўртоқлашишди — бу онлар қувонч, ҳис-туйғу, бахт, бирдамлик ва бирлашув руҳига тўла эди.

Мусиқачилар, кино ва шоу-бизнес юлдузлари, спорт афсоналари ҳам ўйинларга ташриф буюриб, стадионлардаги муҳитдан завқ олишди, мухлислар билан бирга вақт ўтказишди. Улар ҳам қувонч ва мамнуниятга тўлди», – деди Инфантино.

Унинг сўзларига кўра, бундай миқёсдаги мусобақани хавфсиз ва байрамона руҳда ўтказиш бир қатор омиллар туфайли мумкин бўлди.

«Бунинг барчаси учта мезбон мамлакат ҳукуматлари ва уларнинг катта ҳиссаси, сизлар учун меҳнат қилаётган ФИФА жамоаси, қабул қилувчи давлатлар ва уларнинг фуқаролари, полиция ходимларининг улкан фидойилиги, шунингдек, бутун дунёдан келган ихтиёрий ёрдамчилар – ер юзидаги энг йирик спорт тадбирига ҳисса қўшиш учун йўлга чиққан бу ажойиб инсонлар туфайли амалга ошди.

Ҳар бир шаҳар дунёнинг турли бурчакларидан келган мухлислар билан тўлди. Улар кўчаларда байрам қилар экан, айримлар эса шу пайтда нафрат уруғини сочиш билан банд эди.

Биз яшаб турган дунёга нафрат эмас, муҳаббат керак. Ажралиш эмас, бағрикенглик зарур. Қайғу эмас, байрам керак.

Сиз нафрат тарқатиш билан машғул бўлаётган бир пайтда, биз икки қўшни, бир-бирига қарши турган давлатни яқинлаштириш устида тинмай ишлаяпмиз.

Эран терма жамоаси АҚШга ҳеч қандай можаро ёки тўсиқларсиз келди. Эран жамоаси майдонга тушган пайтда уларга қарши айтиладиган шиорлар бир куйга айланиб кетди. Мухлислар бир мамлакатдек, бир жамоадек бирлашиб, Эран термасини қўллаб-қувватлашди. Футболнинг кучи мана шунда намоён бўлади.

Эран жамоаси виза олди, чунки футбол – бу тинчлик. У сиёсат эмас. Футбол – бирлаштирувчи куч, у ажратиш учун эмас. Футбол нафрат ва камситишдан катта.

Кўпчилик визаси рад этилган бир неча кишини тилга олди, аммо визаси маъқулланган миллионлаб мухлислар эътибордан четда қолди. Улар дунёнинг турли мамлакатларидан келди. Чунки футбол дунёни бирлаштиради ва бу ёзда бу ҳолат жуда яққол намоён бўлди.

Ёки Гаитига назар ташланг – бу кўпчилик бормайдиган ёки боришни истамайдиган мамлакат. Балки энди клавиатурадан қўлни олиб, майдонда бор кучини берган жамоаларга, катта меҳнат қилган мамлакатларга, йўлга чиққан мухлисларга, катта орзулар билан ўсиб келаётган болаларга ҳурмат билан қараш вақти келгандир. Балки энди муҳаббатни намоён этиш вақтидир», – дея қўшимча қилди Жанни Инфантино.

Инфантино жаҳон чемпионати атрофидаги танқидларга ҳам тўхталиб ўтди: «Сиз нафрат тарқатиш билан банд бўлган бир пайтда, ФИФА дунёдаги энг катта томошани ташкил этди. Танқидга шунчалик берилиб кетдингизки, бутун қувончни кўрмай қолдингиз. Бир оз тўхтаб, ўйланинг, тафаккур қилинг, дуо қилинг».