Инсайд! "Бунёдкор"да ўзгариш, жамоада Қирғиз Республикаси собиқ бош мураббийи иш бошлайди

Тошкентнинг "Бунёдкор" клуби бош мураббий Мурод Отажоновни истеъфога чиқарди. Клуб унинг ўрнига янги номзод ҳам топиб улгурган.

SPORTS.uz сайтига маълум бўлишича, "қалдирғочлар" Қирғиз Республикаси бош мураббийи сифатида ишлаган Александр Крестинин билан шартнома имзолаган. Тез орада расмий хабар эълон қилинади. 

Мутахассис Қирғиз Республикаси миллий терма жамоаси билан юртимизда бўлиб ўтган "Navruz Cup" мусобақасида ҳам иштирок этган. У бошчилигида қўшниларимиз Ўзбекистон терма жамоамизга 1:3 ҳисобида мағлуб бўлганди.

Эслатиб ўтамиз, мавсумни кўтаринки руҳда бошлаган "Бунёдкор" биринчи даврадан сўнг Суперлигада 9-поғонани банд этиб турибди.