"Интер" президенти мағлубиятга қандай муносабат билдирди?

"Интер" президенти Беппе Маротта Чемпионлар Лигаси финалидаги мағлубият ҳақида фикр билдирди. Турнирнинг ҳал қилувчи ўйинида "Интер" ПСЖга 0:5 ҳисобида имкониятни бой берди. 
 
"Бу салбий кеча бўлди, рақиб биздан ҳар жиҳатда устун келди, биз мағлубиятга муносиб эдик, бу шубҳасиз. Бу бутун мавсумни йўққа чиқармайди, биз жуда кучли жамоа билан ўйнадик. Бу ерга ташриф буюрган мухлисларга миннатдорчилик билдирмоқчиман, аммо бу мутлақо ёмон кеча эди. 
 
Бу босқичга чиқиш жуда мушкул бўлди, бироқ "Барселона" ва "Бавария" каби жамоаларни мағлуб этиб, бунга эришдик. Футболчиларимиз ва мураббийимизга ташаккур айтмоқчиман, биз 59 та ўйин ўтказдик ва бу жамоа ҳамда клуб ушбу босқичга чиқишга муносиб эканлигини кўрсатди. 
 
Инзаги ҳақида? Фикрим заррача ўзгармади. Келаси ҳафта учрашишга келишиб олдик. Инзагининг шартномаси яна бир йил амал қилади ва 4 йил давомида у қўйилган вазифани уддалай олишини исботлади, унинг касбий маҳоратини эътироф этиш лозим. Бир кечаги муваффақиятсизлик барча ютуқларни йўққа чиқармайди" - деди "нераззуррилар" раҳбари.