"Интер" ёзда "Барселона" футболчисини ижарага олмоқчи, аммо...

Миланнинг "Интер" клуби "Барселона" вингери Малкомга жиддий қизиқиб қолди. Бу ҳақда Calciomercato нашри хабар тарқатмоқда.

Юқоридаги манбаага кўра “нерадзуррилар” 22 ёшли бразилиялик футболчини ёзги трансферлар даврида ижарага олишни режалаштиришмоқда. Бироқ, “Барселона” раҳбарияти унинг ижараси борасидаги таклифни рад этиши мумкин. Боиси, улар футболчини фақатгина тўлиқ сотиб юборишади ёки таркибда олиб қолишади.

Эслатиб ўтамиз, Малкомга шунингдек "Ливерпуль", "Тоттенхэм", "Наполи", "Ювентус" ва яна бир қатор Хитой клубларидан қизиқишлар мавжуд.

Маълумот учун, Малком жорий мавсум “Барселона” сафида жами 15та ўйинда майдонга тушди ва ўз рақиблари дарвозасига 3та гол уришга эришди. Унинг клуб билан амалдаги шартномаси 2023 йилга қадар имзоланган.