"Интер" ёзда Лукакуни сотиб юбориши мумкин

"Интер" ҳужумчиси Ромелу Лукаку фаолиятини бошқа жамоада давом эттириши мумкин.

Calciomercato.com нашри тарқатган хабарга қараганда, “нерадзуррилар” мавсум якунлангач, бельгиялик футболчи борасида яхши таклифлар бўлса, уни қабул қилишга тайёр. Аммо Лукакунинг ўзи "Интер"дан кетмоқчи эмас, лекин раҳбарият молиявий инқирозни камайтириш мақсадида шундай йўл тутиши мумкин. Айтиш лозимки, Лукакунинг йиллик маоши 7,5 млн еврони ташкил этади ва у “Интер”нинг энг кўп маош олувчи футболчиси ҳисобланади.

Ромелу Лукакуга ПСЖ ва "Манчестер Сити"дан қизиқишлар мавжуд. Ҳар иккала гранд ҳам ушбу трансферни амалга ошириш учун қулай фурсатни пойламоқда.

Лукаку жорий мавсум А Серияда 20 та ўйинда майдонга тушди ва ўз ҳисобига 14 та гол ҳамда 3 та голли узатма ёздириб қўйишга эришди.