Ислом Аҳмедов Суперлиганинг 17-тури олдидан жамоаларнинг имкониятини қандай баҳолади?

Суперлигамизнинг 17-тури ҳам остонамизда. Бу сафар олдингиларидан фарқли ўлароқ 5 та ўйин ўтказилади.

ОКМК – “Нефтчи” ва “Сўғдиёна” – “Навбаҳор” учрашувлари кейинроқ муддатга – 26 августга сурилган. Боиси, ОКМК билан “Навбаҳор” Осиё Чемпионлар лигаси плей-офф босқичида иштирок этишлари инобатга олиниб, уларнинг ўйинлари белгиланган муддатдан кейинроқ ўтказилади. Унгача эса сиз билан биз 5 та қарама-қаршилик гувоҳига айланамиз. 19-21 август кунлари бўлиб ўтадиган учрашувлар сизни қизиқтириши аниқ.

Футболимиздаги таниқли мутахассисларидан бири Ислом Аҳмедов олдимизда турган 5 та жуфтлик бўйича ўзининг муносабатини айтиб ўтди.

19 август

“Пахтакор” – “Металлург”

- Бу ўйинда “Пахтакор”нинг имкониятини юқори баҳолайман. Шунинг учун 70\30 деган бўлардим. Мезбонлар рақибига қараганда ҳар томонлама кучли. “Пахтакор”да мотивация ҳам бор.

“Насаф” – “Қизилқум”

- Ушбу жуфтликда “Насаф” фаворит. Бунда ҳам имкониятлар 70\30 мезбонлар фойдасига. Бугунги кунда “Насаф” клуби ҳар томонлама кучлироқ. Буни тан олиш керак.

20 август

“Турон” – “Бунёдкор”

- “Бунёдкор”нинг имконияти кўпроқ. Нимага деганда, ўйиндан-ўйинга “Бунёдкор” кучайяпти. Шунинг эвазига улар сафарда кўзлаган мақсадига эришиши мумкин.

“Бухоро” – “Сурхон”

- Бу ерда иккала жамоанинг имконияти 50х50. “Бухоро”да катта мотивация бор. Чунки улар Суперлигада қолиш учун курашишмоқда. “Сурхон” эса ўйиндан-ўйинга кучайишда давом этяпти. Яхши ўйин бўлади.

21 август

“Андижон” – “Олимпик”

- Бу ўйинда “Андижон” жамоасининг имкониятини юқорироқ баҳолайман. Нимага деганда, улар ўз уйида чиройли ўйин кўрсатишяпти. Жамоа қарши ҳужумда ҳам хавфли ўйнайди. Шу боис “Андижон”нинг имкониятини 60\40 баҳолайман.

Шуҳратбек Жўраев.