Ислом Исмоилов: "Саудия Арабистони, Бирлашган Араб Амирликлари ва Черногория термаларини ҳурмат қиламиз, аммо улардан қўрқмаймиз!"

Ўзбекистон U-15 терма жамоаси бош мураббийи Ислом Исмоилов “Mirabror Usmanov Memorial Cup-2023” турнири олдидан жамоалар бош мураббийлари иштирокидаги матбуот анжуманида иштирок этиб, турнир ҳақидаги фикрлари билан ўртоқлашди. Бу ҳақда ЎФА матбуот хизмати хабар берди. 

Турнир ҳақида.

– Авваламбор, ушбу турнирни ташкил этаётган Ўзбекистон футбол ассоциациясига миннатдорлик билдираман. Бу каби жамоаларга қарши ўйинлар муҳим турнирларга тайёргарлик вазифасини ўтайди. Саудия Арабистони, Бирлашган Араб Амирликлари ва Черногория кучли терма жамоалар ҳисобланади. Ўз уйимизда ўйнаётганимиз сабабли, турнирда яхши иштирок этиб, мухлисларни хурсанд этишга ҳаракат қиламиз.

Рақиб жамоалар ҳақида.

– Сўнгги вақтларда ўзбекистонлик футболчилар ҳар қандай жамоага қарши ҳайиқмасдан ҳаракат қилмоқда, буни эришилаётган натижалар ҳам тасдиқлайди. Биз рақибларимизни ҳурмат қиламиз, лекин улардан қўрқмаймиз.